Psalms 102

The prayer of the afflicted

Umkhuleko womuntu okhathazekileyo. Lapho esephela umoya eseqhinqa isililo phambi kukaThixo. Zwana umkhuleko wami, Oh Thixo; ukukhala kwami ngicela uncedo kakufike kuwe. ²Ungangifihleli ubuso bakho nxa ngikhathazekile. Ngipha indlebe yakho; nxa ngibiza ngiphendula masinyane. ³Ngoba insuku zami ziyanyamalala njengentuthu; amathambo ami ayavutha njengamalahle abhebhayo.

⁴Inhliziyo yami yonakele, ibunile njengotshani; ngiyakhohlwa ukudla kwami. ⁵Ngenxa yokububula kwami okukhulu sengiphelile, isikhumba sesinamathela emathanjeni. ⁶Sengifana lesikhova senkangala, njengesikhova semanxiweni.

⁷Ngilala ngikhangele; senginjengenyoni ehlezi yodwa ephahleni. ⁸Ilanga lonke izitha zami ziyangichukuluza; labo abangichothozayo badlala ngebizo lami njengesethuko. ⁹Ngoba ngidla umlotha njengokudla kwami, ngixube okunathwayo kwami ngezinyembezi ¹⁰ngenxa yokuthukuthela kwakho okukhulu, ngoba ungiqukule wangilahlela eceleni.

¹¹Insuku zami zifana lesithunzi sakusihlwa; ngiyabuna njengotshani. ¹²Kodwa wena, Oh Thixo, uhlezi ebukhosini lanininini; udumo lwakho lumi ezizukulwaneni zonke. ¹³Uzaphakama uzwele iZiyoni isihawu, ngoba sekuyisikhathi sokutshengisa umusa kuyo, isikhathi esimisiweyo sesifikile.

¹⁴Ngoba amatshe ayo aligugu ezincekwini zakho; othuli lwayo nje lubalethela usizi. ¹⁵Izizwe zizalesaba ibizo likaThixo, wonke amakhosi omhlaba azahlonipha inkazimulo yakhe. ¹⁶Ngoba uThixo uzayakha kutsha iZiyoni avele enkazimulweni yakhe.

¹⁷Uzaphendula imikhuleko yabahluphekayo; kazukweyisa isicelo sabo. ¹⁸Lokhu kakulotshwe phansi kube ngokwesizukulwane sakusasa, ukuze abantu abangakadalwa bamdumise uThixo : ¹⁹“UThixo wakhangela phansi ephezulu endlini yakhe engcwele, esezulwini wawuhlola umhlaba, ²⁰ukuze ezwe ukububula kwezibotshwa lokukhulula labo ababegwetshelwe ukufa.” ²¹Ngalokho-ke ibizo likaThixo lizamenyezelwa eZiyoni lodumo lwakhe eJerusalema, ²²lapha izizwe lemibuso sekuhlangana ndawonye ukukhonza uThixo.

²³Wawanciphisa amandla ami ngisaphila; waziphungula insuku zami. ²⁴Yikho ngasengisithi, “Ungangithathi, Oh Nkulunkulu wami, ngilokhu ngisephakathi kwensuku zami; iminyaka yakho ihlala ikhona ezizukulwaneni zonke. ²⁵Ekuqaleni wabeka izisekelo zomhlaba, lamazulu angumsebenzi wezandla zakho.

²⁶Konke kuzabhubha, kodwa wena uzasala; konke kuzaguga njengesigqoko. Njengesivunulo uzakuguqula kucine sekulahlwa. ²⁷Kodwa wena uhlala unjalo, leminyaka yakho kayiyikuphela. ²⁸Abantwana bezinceku zakho bazahlala besemehlweni akho; izizukulwane zazo zizaqiniswa phambi kwakho.”