Job 35

What does God gain from you

U-Elihu wasesithi: ²“Ukhumbula ukuthi lokhu kulungile yini? Uthi, ‘Ngizagezwa nguNkulunkulu.’ ³Kodwa uyambuza uthi, ‘Kungisiza ngani lokhu na, njalo ngizuzani ngokungenzi isono?’ ⁴Ngithanda ukukuphendula kanye labangane bakho abalapha.

⁵Ake ukhangele emazulwini ubone; khangela amayezi aphakeme kangaka ngaphezu kwakho. ⁶Ungaze wenze isono, lokho kumthinta ngani na? Nxa izono zakho zizinengi, kwenzani lokho kuye na? ⁷Nxa ulungile, kuyini omnika khona wena na, kumbe yena wamukelani esandleni sakho?

⁸Ububi bakho bulimaza kuphela umuntu onjengawe, lokulunga kwakho kuthinta amadodana abantu kuphela. ⁹Abantu bayakhala ngomthwalo wokuncindezelwa; bacela ukuphunyuzwa ezingalweni zalabo abalamandla. ¹⁰Kodwa kakho othi, ‘Ungaphi uNkulunkulu uMenzi wami na, opha amahubo ebusuku, ¹¹osifundisayo thina kulezinyamazana zalapha emhlabeni asenze sihlakaniphe kulezinyoni zasemoyeni?’ ¹²Kaphenduli nxa abantu bebiza ngenxa yokuziphakamisa kwababi.

¹³Ngempela uNkulunkulu kakulaleli ukuncenga kwabo kwamanga; uSomandla kayilaleli into enjalo. ¹⁴Kuzakuba njani pho, angakulalela nxa usithi kawumboni, usithi indaba yakho iphambi kwakhe ngakho kuzamele ulinde yena, ¹⁵njalo futhi, ukuthi ulaka lwakhe kalujezisi njalo akabunanzi lakancane ububi.

¹⁶Yikho uJobe evula umlomo wakhe ekhuluma ize; ngokuswela ulwazi wandisa amazwi.”