Psalms 55

Cast your burden on the Lord

Kuom jatend wer. Wer gi thumbe man-gi Waya. Maskil mar Daudi. Winj lamona, yaye Nyasaye, kik itamri winjo ywakna; ²Winja kendo idwoka. Pacha chanda kendo chunya onge gi kwe ³Ka awinjo dwond wasika, kendo ka joma timbegi richo okwarona wengegi, nikech gimiyo abedo gi thagruok kendo giyanya ka gin gi mirima.

⁴Chunya winjo malit e iya kendo luoro mar tho osemaka. ⁵Aluor kendo denda tetni; kibaji ogoya matek. ⁶Ne awacho niya, “Yaye mad ne bed ni an gi bwombe ka akuru! Dine afuyo aa ka mi ayudo yweyo.

⁷Dine aringo adhi mabor mi adhi adak e piny ongoro; Sela ⁸dine areto adhi nyaka kara mar pondo, kuma ni mabor gi apaka kod ahiti.” ⁹Lal pach joma timbegi richo, yaye Ruoth, mi lewgi moki e dandgi, nikech aneno ka mahundu gi dhawo opongʼo dala maduongʼ.

¹⁰Odiechiengʼ gotieno gilwenyo kor ohinga mare; himruok gi ayany ni e iye. ¹¹Teko mar kethruok chopo tijgi ei dala maduongʼ, mecho gi wuond osiko e yorene. ¹²Ka dine ok obedo malichna ka dine ngʼat ma ok dwara ema ogarna, to dine apondone.

¹³To en mana in, dichwo kaka an in jawuodha kendo osiepna, ¹⁴mane wan-go gi lalruok matut chon kane wawuotho e dier oganda maduongʼ e od Nyasaye. ¹⁵Mad tho neg wasika apoya, mad liel mwonygi ngili kapod gingima, nikech richo olokogi kar dakne.

¹⁶An to aluongo Nyasaye, kendo Jehova Nyasaye resa. ¹⁷Odhiambo gi okinyi kod odiechiengʼ aywagora ka chunya lit, kendo owinjo dwonda. ¹⁸Owara kapok gimoro ohinya kuom lweny ma ji goyago, kata obedo ni ji mangʼeny kweda.

¹⁹Nyasaye mobet e kom loch nyaka chiengʼ, biro winjogi kendo biro goyogi: Sela jogo motamore loko yoregi kendo ma ok mi Nyasaye luor. ²⁰Jawuodha monjo osiepene; oseketho singruok mane otimo kodgi. ²¹Weche mowacho to yom ka mo mabuo, to lweny to ni e chunye; wechege yomo del moloyo mor wirruok, to kara gin mana ligangla mosewuodh oko.

²²Ket pek manie chunyi ne Jehova Nyasaye to obiro riti; ok obi weyo ngʼat makare podhi. ²³To in, yaye Nyasaye, ibiro dwoko joma timbegi richo piny nyaka ei bur ma gitow; joma joricho machwero remo ok bi bet mangima kata moromo nus ndalogi. An to ageno kuomi.