Psalms 116

I love the Lord, for he heard me

Ahụrụ m Onyenwe anyị nʼanya, nʼihi na ọ nụrụ olu m; ọ nụrụ mkpu akwa m maka ebere. ²Nʼihi na o gere m ntị, aga m akpọku ya oge ndụ m niile. ³Agbụ nke ọnwụ kekọrọ m, oke ihe mgbu nke ili bịakwasịrị m; nsogbu na iru ụjụ dakwasịrị m.

⁴Mgbe ahụ, akpọkuru m aha Onyenwe anyị: “O Onyenwe anyị, zọpụta m!” ⁵Onyenwe anyị bụ onye na-eme ebere na onye ezi omume. Chineke anyị jupụtakwara nʼọmịiko. ⁶Onyenwe anyị na-echebe ndị na-enweghị uche; mgbe m nọ nʼọnọdụ mkpa, ọ zọpụtara m.

⁷Laghachi azụ zuru ike, gị mkpụrụobi m, nʼihi na Onyenwe anyị emesola gị mmeso ọma. ⁸Nʼihi na gị, o Onyenwe anyị, napụtara mkpụrụobi m site nʼọnwụ, anya m site na anya mmiri akwa, napụtakwa ụkwụ m site nʼịsọ ngọngọ, ⁹ka m nwee ike jegharịa nʼihu Onyenwe anyị nʼime ala ebe ndị dị ndụ bi.

¹⁰Ekwenyere m na Onyenwe anyị mgbe m kwuru sị, “Abụ m onye nọ nʼoke nsogbu,” ¹¹nʼime ịda mba m, ekwuru m sị, “Mmadụ niile bụ ndị ụgha.” ¹²Gịnị ka m ga-enyeghachi Onyenwe anyị nʼihi mmeso ọma niile o mesoro m?

¹³Aga m eweli iko nke nzọpụta m elu kpọkuokwa aha Onyenwe anyị. ¹⁴Nʼihu ndị ya niile ka m ga-anọ mezuo nkwa m kwere Onyenwe anyị. ¹⁵Ọnwụ nke ndị nsọ ya dị oke ọnụahịa nʼanya Onyenwe anyị.

¹⁶O Onyenwe anyị, nʼezie, abụ m ohu gị; abụ m ohu gị, nwa nwoke nke ohu gị nwanyị; ị zọpụtala m site na agbụ e kere m. ¹⁷Aga m achụrụ gị aja ekele kpọkuokwa aha Onyenwe anyị. ¹⁸Ọ bụkwa nʼihu ndị ya niile ka m ga-anọ kwụghachi Onyenwe anyị nkwa m kwere, ¹⁹nʼime ogige ụlọ Onyenwe anyị, nʼetiti gị, O Jerusalem. Toonu Onyenwe anyị.