Isaiah 43
I have called you by name
1हे याकूब, जऊन ह तोला बनाईस, हे इसरायल, जऊन ह तोला रचिस, अब ओ यहोवा ह ये कहत हे: “झन डर, काबरकि मेंह तोला छोंड़ाय हंव; मेंह तोला नांव लेके बलाय हंव, तेंह मोरेच अस। 2जब तेंह पानी म ले होके जाबे, त मेंह तोर संगे-संग रहिहूं; अऊ जब तेंह नदीमन ले होके जाबे, तब ओमन तोला नइं बुड़ो सकंय। जब तेंह आगी म रेंगबे, तब तोला आंच नइं लगय; अऊ ओकर जुवाला ह तोला नइं जला सकय। 3काबरकि में यहोवा तोर परमेसर अंव, इसरायल के पबितर परमेसर, तोर उद्धार करइया अंव; तोर छुड़ौती म मेंह मिसर देस ला अऊ तोर बदला कूस अऊ सबा देसमन ला देथंव। 4मोर नजर म तेंह अनमोल अऊ आदर के योग्य अस, अऊ काबरकि मेंह तोर ले मया करथंव, एकर कारन में तोर बदला म मनखेमन ला अऊ तोर परान के बदला म जाति-जाति के मनखेमन ला दे दूहूं। 5झन डर, काबरकि में तोर संग हवंव; मेंह तोर लइकामन ला पूरब ले लानहूं अऊ पछिम ले घलो तोला इकट्ठा करहूं। 6मेंह उत्तर ले कहिहूं, ‘ओमन ला देय दे!’ अऊ दक्खिन ले कहिहूं, ‘ओमन ला रोकके झन रख।’ मोर बेटामन ला दूरिहा ले अऊ मोर बेटीमन ला धरती के छोर ले लेय आवव— 7हर एक जन, जऊन ह मोर नांव ले जाने जाथे, जेला मेंह अपन महिमा बर सिरजेंव, जेला मेंह रचेंव अऊ बनाएंव।” 8ओमन ला ले आवव, जेमन आंखी के रहत अंधवा अंय, अऊ कान के रहत भैंरा अंय।
9जाति-जाति के मनखेमन एक संग जूरंय अऊ मनखेमन जमा होवंय। ओमन के कोन देवता ह ये बात ला पहिले ले बताय रिहिस अऊ हमन ला पहिली के चीजमन के घोसना करे रिहिस? ओमन अपन गवाहमन ला लानके साबित करंय कि ओमन सही अंय, ताकि आने मन सुनंय अऊ कहंय, “येह सच अय।” 10यहोवा ह घोसना करत हे, “तुमन मोर गवाह अव, अऊ मोर सेवक अव, जेमन ला मेंह चुने हंव, ताकि तुमन जानव अऊ मोर ऊपर बिसवास करव अऊ ये बात ला समझव कि में ओही अंव। मोर ले पहिली कोनो देवता के रचना नइं होईस, अऊ न ही कोनो मोर बाद होहीं। 11में ही यहोवा अंव, अऊ मोला छोंड़ कोनो अऊ उद्धारकर्ता नइं एं। 12मेंह परगट करे हंव अऊ उद्धार करेंव अऊ घोसना करेंव— में, अऊ तुम्हर बीच म कोनो अऊ पराया देवता नइं। तुमन ही मोर गवाह अव,” यहोवा ह घोसना करत हे, “कि में परमेसर अंव। 13हव, अऊ प्राचीन समय ले मेंह ओही अंव। मोर हांथ ले कोनो छोंड़ा नइं सकंय। जब मेंह काम करथंव, त कोन ह ओला पलट सकथे?”
A way in the wilderness
14तुम्हर छुड़इया, इसरायल के पबितर परमेसर, यहोवा ह ये कहत हे: “तुम्हर बर मेंह बेबिलोन ला भेजहूं अऊ जम्मो बेबिलोनीमन ला भगोड़ा के सहीं ले आहूं, ओमन ला पानी जहाज म ले आहूं, जेकर ऊपर ओमन घमंड करथें। 15में, यहोवा, तुम्हर पबितर परमेसर, इसरायल के सिरजइया, तुम्हर राजा अंव।” 16यहोवा ह ये कहत हे— जऊन ह समुंदर म एक रसता, पानी के तेज लहरा म एक डहार बनाईस, 17जऊन ह रथ अऊ घोड़ामन ला, सेना अऊ सैनिक ताकत ला एक संग निकाल लेथे, अऊ ओमन उहां पड़े रहिथें, अऊ फेर कभू नइं उठंय, ओमन खतम हो गीन, एक ठन बाती के सहीं बुता गीन: 18“पहिली के चीजमन ला सुरता झन करव; भूतकाल म झन जीयव। 19देखव, में एक नवां चीज करत हंव! येह परगट होवत हे; का तुमन येला नइं समझत हव? मेंह सुनसान जगह म एक रसता अऊ निरजल देस म सोतामन ला बनात हंव। 20जंगल के पसु, गीदड़ अऊ उल्लूमन मोर आदर करथें, काबरकि में सुनसान जगह म पानी अऊ निरजल जगह म सोतामन ला निकालथंव, ताकि मोर मनखे, मोर चुने मनखेमन पानी पीयंय, 21ये मनखे, जेमन ला मेंह अपन बर बनाय हंव ताकि ओमन मोर परसंसा करंय।
I blot out your transgressions
22“तभो ले, हे याकूब, तेंह मोला नइं पुकारे हस, हे इसरायल, तेंह अपनआप ला मोर बर नइं थकाय हस। 23तेंह होम-बलिदान करे बर मोर मेर भेड़ नइं लाने हस, अऊ न ही अपन बलिदानमन ला चघाके मोर आदर करे हस। मेंह अन्न-बलिदान चघाय के बोझ तोर ऊपर नइं डाले हंव, न ही धूप के मांग करके तोला थकाय हंव। 24तेंह मोर बर कोनो खुसबूवाला तेजपान नइं लाने हस, अऊ न ही मोला अपन बलिदान के चरबी चघाय हस। पर तेंह अपन पापमन के दुवारा मोर ऊपर बोझा डाले हस अऊ अपन अधरम के काम ले मोला थका दे हस। 25“में, में ही ओ अंव, जऊन ह अपन नांव बर तोर पापमन ला मेटा देथंव, अऊ तोर पापमन ला फेर सुरता नइं करंव। 26मोर खातिर पहिले के चीजमन ला सुरता कर, आ, हमन ओ बात ऊपर आपस म बहस करन; तें अपन मामला ला बता, जऊन ह तोला निरदोस ठहिराथे। 27तोर पहिली पुरखा ह पाप करिस; जेमन ला मेंह तोर मेर सिखाय बर पठोंय, ओमन मोर ले बिदरोह करिन। 28एकर कारन मेंह तोर मंदिर के सम्मानीय मनखेमन ला कलंकित करेंव; मेंह याकूब ला बिनास बर अऊ इसरायल ला अपमानित होय बर सऊंप देंव।