Isaiah 12

I will trust and not be afraid

¹ओ दिन तें कहिबे: “हे यहोवा, मेंह तोर परसंसा करहूं। हालाकि तें मोर ऊपर रिस करत रहे, पर तोर रिस ह सांत हो गीस अऊ तेंह मोला सांति देय हवस। ²खचित परमेसर ह मोर उद्धार अय; मेंह भरोसा रखहूं अऊ नइं डरहूं। काबरकि यहोवा, यहोवा खुद मोर बल अऊ मोर सुरकछा अय; ओह मोर उद्धारकर्ता हो गे हवय।” ³आनंद समेत तुमन उद्धार के कुआंमन ले पानी भरहू। ⁴ओ दिन तुमन कहिहू: “यहोवा के परसंसा करव, ओकर नांव के घोसना करव; जाति-जाति के मनखेमन के बीच ओकर काममन के परचार करव, अऊ घोसना करव कि ओकर नांव महान अय। ⁵यहोवा के भजन गावव, काबरकि ओह परतापी काम करे हवय; ये बात जम्मो संसार म बतावव। ⁶हे सियोन के मनखेमन, जोर से चिचियावव अऊ आनंद के मारे गावव, काबरकि इसरायल के पबितर परमेसर ह तुम्हर बीच महान अय।”