2 Samuel 23
The last words of David
1दाऊद के आखिरी बचन ये अय: “यिसै के बेटा दाऊद के उत्साह देवइया बचन, ओ मनखे के बचन, जेला सर्वोच्च परमेसर ह ऊपर उठाईस, ओ मनखे, जेला याकूब के परमेसर ह अभिसेक करिस, इसरायल के गीतमन के नायक: 2“यहोवा के आतमा ह मोर जरिये गोठियाईस; ओकर बचन ह मोर मुहूं म रिहिस। 3इसरायल के परमेसर ह गोठियाईस, इसरायल के चट्टान ह मोर ले कहिस: ‘जब एक झन धरमीपन म मनखेमन ऊपर सासन करथे, जब ओह परमेसर के भय मानत सासन करथे, 4ओह बिहनियां सूरज निकले के बेरा के अंजोर सहीं अय अइसन बिहनियां, जेमा बादर नइं होवय, जइसन बरसात होय के बाद चमकीलापन होथे जेह भुइयां ले हरियर-हरियर कांदी उगाथे।’ 5“यदि मोर घराना के सही संबंध परमेसर के संग नइं होतिस, त खचित ओह मोर संग सदा के एक करार नइं करतिस, जऊन ह हर किसम ले ठीक अऊ सुरकछित हवय; खचित ओह मोर उद्धार के फर ला नइं लानतिस अऊ मोर हर ईछा ला पूरा नइं करतिस। 6पर जम्मो दुस्ट मनखेमन कांटा के सहीं बाजू म फटिक दिये जाय बर होथें, जेला हांथ ले नइं संकेले जावय। 7जऊन ह कांटा ला छूथे ओह लोहा के कोनो चीज या कोनो भाला के डंडा के उपयोग करथे; जहां ओमन पड़े रहिथें, ओ जगह ला जला दिये जाथे।”
The mighty men of David
8दाऊद के तीन बड़े सूरबीरमन के नांव: योसेब-यसेबेत, येह एक तहकमोनी रिहिस अऊ तीनों झन के मुखिया रिहिस; ओह आठ सौ आदमीमन ऊपर अपन बरछी उठाईस अऊ ओमन ला एकेच मुकाबला म मार डारिस। 9ओकर बाद अहोही दोदै के बेटा एलिआजर रिहिस। तीन बड़े योद्धा म ले एक झन के रूप म, ओह ओ समय म दाऊद के संग रिहिस, जब ओमन पलिस्तीमन ला ताना मारिन, जब पलिस्तीमन लड़ई बर पस-दमीम म जूरे रिहिन। तब इसरायलीमन पाछू हट गीन, 10पर एलिआजर ह सामना करिस अऊ ओह पलिस्तीमन ला तब तक मारत गीस, जब तक कि ओकर हांथ ह थकके तलवार ले चिपट नइं गीस। ओ दिन यहोवा ह एक बड़े जीत दिलाईस। सेना ह एलिआजर करा लहुंटके आईस, पर सिरिप मरे मनखेमन के सामान लूटे बर। 11ओकर बाद, हरारी अगी के बेटा सम्मा रिहिस। जब पलिस्तीमन एक अइसन जगह म एक संग जूरिन, जिहां मसूर दाल ले भरे एक खेत रिहिस, त इसरायल के सेना ह ओमन ले डरके भाग गीस। 12पर सम्मा ह खेत के मांझा म ठाढ़ होके ओमन के सामना करिस। ओह बचाव करिस अऊ पलिस्तीमन ला मार गिराईस, अऊ यहोवा ह एक बड़े जीत दिलाईस। 13फसल लुए के समय, तीस मुख्य सूरबीरमन ले तीन झन दाऊद करा अदुल्लाम के गुफा म आईन, अऊ ओ समय, पलिस्तीमन के एक दल ह रपाईम के घाटी म डेरा डाले रहय। 14ओ बेरा दाऊद ह गढ़ म रिहिस, अऊ पलिस्तीमन के गढ़ के सेना ह बैतलहम म रिहिस। 15दाऊद ला बहुंत पीयास लगिस, त ओह कहिस, “हाय, कोनो मोला बैतलहम के दुवार के लकठा के कुआं ले पानी लानके पीयावव!”
16त ओ तीनों सूरबीरमन पलिस्तीमन के कतार ला टोरके बैतलहम के दुवार के लकठा के कुआं ले पानी निकालिन अऊ ओ पानी ला लेके दाऊद करा वापिस आ गीन। पर ओह ओ पानी ला पीये ले मना करिस, अऊ ओह ओ पानी ला यहोवा के आघू म ढार दीस, 17अऊ कहिस, “हे यहोवा, अइसन काम करई ह मोर ले दूरिहा रहय! का येह ओ आदमीमन के लहू नो हय, जेमन अपन परान ला जोखिम म डालके गेय रिहिन?” अऊ दाऊद ह ओ पानी ला नइं पीईस। अइसने बीरता के काम रिहिस ओ तीनों बड़े सूरबीरमन के। 18सरूयाह के बेटा, योआब के भाई अबीसै ह ओ तीनों झन के मुखिया रिहिस। ओह तीन सौ आदमीमन के बिरूध अपन बरछी उठाके ओमन ला मार डारिस, अऊ ये किसम ले ओह ओ तीनों के सहीं नामी हो गीस। 19का ओ तीनों ले ओकर जादा आदर नइं होईस? ओह ओमन के सेनापति बनिस, हालाकि ओला ओ तीनों के बीच सामिल नइं करे गीस। 20यहोयादा के बेटा बनायाह ह कबसेल सहर के एक बड़े बीर रिहिस, अऊ ओह बहुंत बीरता देखाईस। ओह मोआब के दू झन सबले बड़े योद्धामन ला मार गिराईस। बरफ गिरे के दिन म ओह खाल्हे एक खंचवा म उतरके एक सिंह ला घलो मार डारिस। 21दूसर बार ओह एक बहुंत बड़े मिसरी मनखे ला मार डारिस। हालाकि ओ मिसरी मनखे ह अपन हांथ म बरछी धरे रिहिस, पर बनायाह एक ठन बड़े लउठी लेके ओकर बिरूध गीस। ओह ओ मिसरी मनखे के हांथ ले बरछी ला छीन लीस अऊ ओकरेच बरछी ले ही ओला मार डारिस। 22अइसने-अइसने बीरता के काम यहोयादा के बेटा बनायाह ह करिस; ओह घलो ओ तीनों बड़े सूरबीरमन सहीं नामी रिहिस। 23ओला ओ तीस सूरबीरमन ले जादा आदर मिलिस, पर ओला ओ तीनों म सामिल नइं करे गीस। अऊ दाऊद ह ओला अपन अंग रकछकमन के मुखिया ठहिराईस।
24येमन ओ तीस योद्धा रिहिन: योआब के भाई असाहेल, बैतलहम के दोदो के बेटा एल्हानान, 25हेरोदी सम्मा, हेरोदी एलीका, 26पलती हेलेस, तकोआ ले इक्केस के बेटा ईरा, 27अनातोत ले अबिएजेर, हूसाती सिब्बकै, 28अहोही सलमोन, नतोपाती महरै, 29नतोपाती बाना के बेटा हेलेद, बिनयामीन म गिबा नगर ले रीबै के बेटा इतै, 30पिरातोनी बनायाह, गास के घाटीमन के इलाका ले हिद्दै, 31अरबात के अबी-अल्बोन, बरहूमी अजमावेत,
32सालबोनी एल्यहबा, यासेन के बेटामन, योनातन 33हरारी सम्मा के बेटा, हरारी सारार के बेटा अहीआम, 34माकाती अहसबै के बेटा एलीपेलेत, गीलोनी अहीतोपेल के बेटा एलीआम, 35करमेली हेसरो, अराबी पारै, 36सोबा ले नातान के बेटा इगाल, हगरी के बेटा, 37अमोनी सेलेक, बेरोती नहरै, जऊन ह सरूयाह के बेटा योआब के हथियार ढोवइया रिहिस, 38येतेरी ईरा, येतेरी गारेब, 39अऊ हित्ती उरियाह।