Matthew 12

The Lord of the Sabbath

Isa sadto ka tion, sa Adlaw nga Inugpahuway, nagaagi sila ni Jesus sa kaumahan sang trigo. Gutom gid ang iya mga sumulunod, gani namuksi sila sang mga uhay sang trigo kag nagkaon. ²Pagkakita sadto sang mga Pariseo nagsiling sila kay Jesus, “Tan-awa ang imo mga sumulunod! Ginahimo nila ang ginabawal nga himuon sa Adlaw nga Inugpahuway.” ³Ginsabat sila ni Jesus, “Wala bala ninyo mabasahi [sa Kasulatan] ang ginhimo ni David sang siya kag ang iya mga kaupod gin-gutom?

⁴Nagsulod siya sa balay sang Dios kag ginkaon niya kag sang iya mga kaupod ang tinapay nga ginhalad sa Dios, bisan pa nga ginabawal [sang Kasuguan] ang magkaon sadto luwas lang sa mga pari. ⁵Kag isa pa, wala bala ninyo mabasahi sa Kasuguan nga ang mga pari [nagaobra] sa templo bisan Adlaw nga Inugpahuway? Isa ini ka pagsupak sa pagsulundan sa Adlaw nga Inugpahuway, pero wala sila nakasala. ⁶Ang matuod may ari diri nga mas importante pa sa templo.

⁷Kay [ako nga] Anak sang Tawo may gahom sa pagsiling kon ano ang husto nga himuon sa Adlaw nga Inugpahuway. Kon naintiendihan ninyo ining [ginasiling sang Dios sa Kasulatan,] ‘Indi ang [inyo mga] halad ang akon luyag kundi ang [inyo] kaluoy [sa inyo isigkatawo],’ wala ninyo kuntani pagpakalaina ang mga tawo nga wala sing sala.” ⁸Naghalin si Jesus sa sadto nga lugar kag nagkadto sa simbahan sang mga Judio.

Healing on the Sabbath

⁹May tawo didto nga pingkaw ang kamot. Kag may mga Pariseo man didto nga nagapangita sang kabangdanan nga maakusar nila si Jesus. Gani nagpamangkot sila kay Jesus, “Tugot bala ang pagpang-ayo sa Adlaw nga Inugpahuway?” ¹⁰Nagsabat si Jesus sa ila, “Abi may karnero kamo nga nahulog sa buho sa Adlaw nga Inugpahuway. Ano, pabay-an lang bala ninyo tungod kay Adlaw nga Inugpahuway? Siyempre, kuhaon ninyo! ¹¹Pero ang tawo mas importante pa sang sa karnero. Gani ginatugot [sang Kasuguan] ang pagbulig sa isigkatawo bisan pa sa Adlaw nga Inugpahuway.” ¹²Dayon nagsiling si Jesus sa tawo [nga pingkaw], “Untaya ang imo kamot.” Gin-untay niya, kag nag-ayo ini pareho sang isa niya ka kamot.

¹³Dayon nagguwa ang mga Pariseo kag nagplano sila kon paano nila mapatay si Jesus. ¹⁴Sang mahibaluan ni Jesus ang plano sang mga Pariseo, naghalin siya sa sadto nga lugar. Madamo nga tawo ang nagsunod sa iya kag gin-ayo niya ang tanan nga masakiton.

The chosen servant

¹⁵Ginpaandaman niya sila nga indi magpanugid sa iban parte sa iya. ¹⁶Katumanan ini sang ginsiling sang [Dios paagi kay] Propeta Isaias: ¹⁷“Ari ang akon ginpili nga alagad. Palangga ko siya kag nalipay ako sa iya. Gamhan ko siya sang akon Espiritu, kag ipahayag niya ang hustisya sa mga nasyon.

¹⁸Indi siya magpakigbais ukon magsinggit, kag indi mabatian ang iya tingog sa mga dalan. ¹⁹Indi niya pagpabay-an ang mga maluya sa pagtuo ukon pagtalikdan ang mga nadulaan na sang paglaom. [Indi siya mag-untat] hasta nga mapahari niya ang hustisya. ²⁰Kag ang mga tawo sa tanan nga nasyon magalaom sa iya.” ²¹Karon may gindala kay Jesus nga tawo nga bulag kag apa tungod kay ginagamhan siya sang demonyo. Gin-ayo ni Jesus ang tawo kag dayon nakahambal na siya kag nakakita.

A house divided

²²Natingala ang tanan, kag nagsiling sila, “Siya ayhan ang kaliwat ni David?” ²³Pagkabati sang mga Pariseo nagsiling sila, “Ina nga tawo nagatabog sang mga demonyo paagi sa gahom nga ginhatag sa iya ni Satanas nga amo ang pangulo sang mga demonyo.” ²⁴Nahibaluan ni Jesus ang ila hunahuna, gani nagsiling siya sa ila, “Kon ang [mga pumuluyo sang] isa ka ginharian magbinahin-bahin kag mag-ilinaway, ina nga ginharian malaglag. Amo man ang matabo sa bisan ano nga banwa ukon panimalay kon [ang mga nagaestar dira] magbinahin-bahin kag mag-ilinaway.

²⁵Gani kon si Satanas mismo ang nagatabog sang iya mga sakop, nagapakita lang ina nga nagabinahin-bahin sila kag nagailinaway. Ti paano pa makapadayon ang iya ginharian? ²⁶Kag kon si Satanas ang nagahatag sa akon sang gahom para magtabog sang mga demonyo, sin-o ang nagahatag sang gahom sa inyo mga sumulunod nga nagatabog man sang mga demonyo? Ang inyo mga sumulunod mismo nagapamatuod nga sala gid kamo. ²⁷Karon, tungod kay nagatabog ako sang mga demonyo paagi sa Espiritu sang Dios, nagapamatuod ini nga ang paghari sang Dios nag-abot na sa inyo.

²⁸“Ang matuod, wala sing tawo nga sarang makasulod sa balay sang makusog nga tawo sa pagkuha sang iya mga pagkabutang kon indi niya anay paggapuson inang makusog nga tawo. Pero kon magapos na niya, makapagusto na siya sa pagkuha sang mga pagkabutang sa sina nga balay. ²⁹“Ang wala nagaapin sa akon, kontra sa akon. Kag ang wala nagabulig sa akon sa pagtipon [sang mga tawo sa Dios] nagapalapta lang. ³⁰Gani sugiran ko kamo; ang bisan ano nga sala kag pagpakalain, mapatawad. Pero ang nagapakalain sa Espiritu [Santo] indi gid mapatawad.

The sin against the Spirit

³¹Ang bisan sin-o nga maghambal sing malain kontra sa [akon nga] Anak sang Tawo mapatawad, pero ang magpakalain sa Espiritu Santo indi gid mapatawad sa sini nga panahon ukon sa palaabuton nga panahon. ³²“Kon maayo ang kahoy maayo man ang iya bunga; kon malain ang kahoy malain man ang iya bunga. Ang kahoy makilala sa iya bunga.

The tree and its fruit

³³Mga kaliwat kamo sang man-og! Kag tungod nga kamo malain, paano kamo makahambal sang maayo? Kay kon ano ang ara sa tagipusuon amo man ang nagaguwa sa baba. ³⁴Ang maayo nga tawo nagahambal sang maayo, kay maayo ang iya ginahunahuna. Pero ang malain nga tawo nagahambal sang malain, kay malain ang iya ginahunahuna. ³⁵Sa pagkamatuod, sa adlaw sang paghukom, ang kada isa magapanabat sa Dios sa iya mga ginahambal nga wala sing pulos.

³⁶Kay ibasi sa imo mga ginahambal kon silutan ka ukon indi.” ³⁷May mga manunudlo sang Kasuguan kag mga Pariseo nga nagsiling kay Jesus, “Manunudlo, abi pakitai kami sang isa ka milagro bilang pamatuod [nga ginpadala ka sang Dios].”

The sign of Jonah

³⁸Nagsabat si Jesus sa ila, “[Kamo nga mga tawo sa] sini nga henerasyon, tama kalaot kag indi matutom sa pagsunod sa Dios. Nagapangayo kamo sang milagro, pero wala sing milagro nga ipakita sa inyo luwas sa milagro nga pareho sang natabo kay Propeta Jonas. ³⁹Subong nga si Jonas tatlo ka adlaw kag tatlo ka gab-i sa tiyan sang dako nga isda, amo man ang matabo sa [akon nga] Anak sang Tawo. Kay magapabilin ako sa sulod sang tatlo ka adlaw kag tatlo ka gab-i sa idalom sang duta. ⁴⁰Sa adlaw sang paghukom, mabanhaw ang mga taga-Nineve upod sa [inyo nga mga tawo sa] sini nga henerasyon kag basulon nila kamo. Kay pagkabati sang mga taga-Nineve sadto sang wali ni Jonas, naghinulsol sila. Karon may ari diri nga labaw pa kay Jonas, [pero wala kamo naghinulsol sang nagwali siya sa inyo].

⁴¹Sa adlaw sang paghukom, mabanhaw [man] ang rayna nga halin sa south upod sa [inyo nga mga tawo sa] sini nga henerasyon kag basulon niya [kamo]. Kay naghalin pa siya sa pinakamalayo nga parte sang kalibutan sa pagpamati sa kaalam ni [Haring] Solomon. Karon may ari diri nga labaw pa kay Solomon, [pero wala kamo nagpamati sa iya]. ⁴²“Kon magguwa ang mahigko nga espiritu sa tawo nga iya ginsudlan, nagalibot siya sa mga lugar nga wala sing tubig kay nagapangita siya sang lugar nga iya mapahuwayan. Kon indi siya makakita sang palahuwayan

The return of the unclean spirit

⁴³magahunahuna siya nga magbalik na lang sa iya ginhalinan. Kag kon sa iya pagbalik makita niya nga ang iya ginhalinan wala sing may nagaestar, matinlo kag nahimos ang tanan, ⁴⁴malakat siya dayon kag manghagad sang pito pa gid ka espiritu nga mas malain pa sang sa iya. Magasulod sila sa sadto nga tawo kag didto mag-estar. Kag ang kahimtangan sang tawo mangin grabe pa gid sang sa una. Amo man ina ang matabo sa sining malain nga henerasyon; [magadugang pa gid ang ila kalaot].” ⁴⁵Samtang nagahambal pa si Jesus, nag-abot ang iya iloy kag ang iya mga utod. Nagahulat sila sa guwa kay luyag nila nga magpakighambal sa iya.

Who is my mother

⁴⁶May isa ka tawo nga nagsiling sa iya, “Ang imo iloy kag mga utod nagahulat sa guwa. Luyag nila nga magpakighambal sa imo.” ⁴⁷Nagsabat si Jesus sa iya, “Nahibaluan mo bala kon sin-o ang akon iloy kag mga utod?” ⁴⁸Dayon gintudlo niya ang iya mga sumulunod kag nagsiling, “Amo ini sila ang akon iloy kag mga utod!

⁴⁹Kay ang bisan sin-o nga nagahimo sang kabubut-on sang akon Amay sa langit amo ang akon iloy kag mga utod.”