Job 12

Wisdom belongs to God

Dayon nagsabat si Job, ²“Nagahunahuna kamo nga kamo lang ang maalam kag wala na sing may mabilin pa nga maalam kon mapatay na kamo. ³Pero maalam man ako pareho sa inyo; indi kamo labaw sa akon. Nahibaluan ko man ining tanan nga inyo ginsiling.

⁴Nangin kaladlawan ako sa akon mga abyan bisan matarong ako kag wala sing kasawayan, kag bisan ginasabat sadto sang Dios ang akon mga pangamuyo. ⁵Ang mga tawo [nga pareho sa akon] nga nagaantos kag daw sa matumba na, ginainsulto sang mga tawo nga nagapatawhay-tawhay lang. ⁶Pero ang mga tulisan kag ang mga tawo nga nagapaakig sa Dios nagakabuhi nga malinong bisan ang ila ikasarang amo ang ila ginapakadios.

⁷“Magtuon ka bala sa bisan ano nga klase sang sapat— ang nagalakat, ang nagalupad, ang nagakamang, kag ang nagalangoy. ⁸Kay tanan sila nakahibalo sining ginhimo sang Ginoo. ⁹Ara sa iya kamot ang kabuhi ukon ang ginhawa sang tanan nga tinuga, pati sang tawo.

¹⁰Kon ang dila sang tawo makahibalo kon ano ang manamit ukon indi manamit nga pagkaon, ang dulunggan sang tawo makahibalo man kon ano ang maayo ukon malain nga mga pulong. ¹¹Madamo sing nahibaluan ang tigulang nga tawo, kay samtang nagalawig ang iya kabuhi, nagadamo pa gid ang iya nahibaluan. ¹²“Pero ang Dios indi lamang may kaalam kundi may gahom pa, kag sa iya lang ang [matuod nga] pag-intiendi kon ano ang dapat himuon.

¹³Wala sing may makakay-o sa iya ginaguba, kag wala sing may makahilway sa iya ginapriso. ¹⁴Kon punggan niya ang ulan, nagamala ang duta, kag kon pabay-an niya ang ulan, nagabaha kag nagakahalitan ang duta. ¹⁵Makusog siya kag madinalag-on, kag ara sa idalom sang iya gahom ang nagapangdaya kag ang ginadayaan.

¹⁶Ginadula niya ang kaalam sang mga manuglaygay, kag ginapabuang niya ang mga manughukom. ¹⁷Ginapahalin niya ang mga hari sa ila trono kag ginapabihag. ¹⁸Ginakuha niya ang mga pari kag ang mga tawo sa ila gamhanan nga posisyon.

¹⁹Ginapahipos niya ang mga ginasaligan nga mga manuglaygay, kag ginakuha niya ang husto nga pag-intiendi sang mga tigulang. ²⁰Ginainsulto niya ang dungganon nga mga tawo, kag ginakuhaan niya sang gahom ang gamhanan nga mga tawo. ²¹Ginapahayag niya ang mga sekreto, kag ginapasanag ang madulom.

²²Ginapagamhanan niya kag ginapasangkad ang mga nasyon, pero ginapierdi man niya ini kag ginalaglag. ²³Ginahimo niya nga mga buang-buang ang [ila] mga pangulo, kag ginapatalang-talang sila sa kamingawan. ²⁴Nagapangapkap sila sa madulom kag nagaduling-duling pareho sa hubog.