Genesis 46

God speaks at Beersheba

Naglakat si Jacob kaupod ang iya panimalay kag dala ang tanan niya nga pagkabutang. Pag-abot niya sa Beersheba, naghalad siya sa Dios sang iya amay nga si Isaac. ²Pagkagab-i, nagpakighambal ang Dios sa iya paagi sa isa ka palanan-awon. Gintawag sang Dios si Jacob, kag nagsabat si Jacob sa iya. ³Dayon nagsiling siya, “Ako ang Dios, nga amo ang Dios sang imo amay. Indi ka magkahadlok sa pagkadto sa Egypt, kay himuon ko kamo didto nga isa ka bantog nga nasyon.

⁴Ako mismo ang kaupod mo sa pagkadto sa Egypt kag sa pagbalik [sa Canaan]. Kag kon mapatay ka na, ara si Jose sa imo tupad.” ⁵Ginpasakay si Jacob sang iya mga anak sa mga karo nga ginhatag sang hari sang Egypt para sakyan niya. Ginpasakay man nila ang ila mga asawa kag mga kabataan, kag naghalin sila didto sa Beersheba. ⁶Gindala nila ang ila mga kasapatan kag mga pagkabutang nga natipon nila sa Canaan. Nagkadto si Jacob sa Egypt kaupod ang tanan niya nga mga kaliwat: ang iya mga anak kag mga apo.

Those who went to Egypt

⁷Amo ini ang mga ngalan sang mga Israelinhon, ang mga kaliwat ni Jacob, nga nagkadto sa Egypt: si Reuben, nga kamagulangan nga anak ni Jacob, ⁸kag ang iya mga anak nga sila ni Hanoc, Palu, Hezron kag Carmi; ⁹si Simeon kag ang iya mga anak nga sila ni Jemuel, Jamin, Ohad, Jakin, Zohar kag si Shaul nga anak ni Simeon sa babayi nga Canaanhon; ¹⁰si Levi kag ang iya mga anak nga sila ni Gershon, Kohat kag Merari; ¹¹si Juda kag ang iya mga anak nga sila ni Er, Onan, Shela, Perez kag Zera (pero si Er kag si Onan napatay sa Canaan), kag ang mga anak ni Perez nga si Hezron kag si Hamul; ¹²si Isacar kag ang iya mga anak nga sila ni Tola, Pua, Jashub kag Shimron; ¹³si Zebulun kag ang iya mga anak nga sila ni Sered, Elon kag Jaleel.

¹⁴Sila ang 33 ka anak kag apo ni Jacob kay Lea nga natawo sa Padan Aram, wala labot sa iya anak nga babayi nga si Dina. ¹⁵[Nag-upod man sa Egypt:] si Gad kag ang iya mga anak nga sila ni Zefon, Hagi, Shuni, Ezbon, Eri, Arodi kag Areli; ¹⁶si Asher kag ang iya mga anak nga sila ni Imna, Ishva, Ishvi, Beria kag ang utod nila nga babayi nga si Sera, kag ang mga anak ni Beria nga si Heber kag si Malkiel.

¹⁷Sila ang 16 ka anak kag apo ni Jacob kay Zilpa, [ang suluguon] nga ginhatag ni Laban kay Lea. ¹⁸Ang mga anak ni Jacob kay Raquel amo si Jose kag si Benjamin. ¹⁹Ang mga anak ni Jose kay Asenat nga natawo sa Egypt amo si Manase kag si Efraim. (Si Asenat anak nga babayi ni Potifera nga pari [sa banwa] sang On.)

²⁰[Nag-upod man sa Egypt:] si Benjamin kag ang iya mga anak nga sila ni Bela, Beker, Ashbel, Gera, Naaman, Ehi, Rosh, Mupim, Hupim kag Ard. ²¹Sila ang 14 ka anak kag apo ni Jacob kay Raquel. ²²[Nag-upod man sa Egypt:] si Dan kag ang iya anak nga si Hushim; ²³si Naftali kag ang iya mga anak nga sila ni Jazeel, Guni, Jezer kag Shilem.

²⁴Sila ang 7 ka anak kag apo ni Jacob kay Bilha, [ang suluguon] nga ginhatag ni Laban kay Raquel. ²⁵Ang kadamuon sang mga anak kag mga apo ni Jacob nga nagkadto sa Egypt 66 tanan, kag wala pa labot diri ang mga asawa sang iya mga anak. ²⁶Pati sa duha ka anak ni Jose nga natawo sa Egypt, 70 tanan ang kabilugan sang panimalay ni Jacob sang nagkadto siya sa Egypt.

²⁷[Sang wala pa sila makaabot sa Egypt,] ginsugo ni Jacob si Juda nga mag-una kadto kay Jose para itudlo sa ila ang [lugar sang] Goshen. Sang pag-abot na nila ni Jacob sa Goshen,

Father and son meet again

²⁸nagsakay si Jose sa iya karwahe kag nagkadto didto sa pagsugata sa iya amay. Sang magkitaay sila, ginhakos ni Jose ang iya amay kag sige ang iya hibi. ²⁹Nagsiling si Jacob kay Jose, “Karon handa na ako nga mapatay tungod nakita ko na ikaw nga buhi.” ³⁰Dayon nagsiling si Jose sa iya mga utod kag sa bilog nga panimalay sang iya amay, “Malakat ako kag sugiran ko ang hari sang Egypt nga nag-abot na ang akon mga utod kag ang bilog nga panimalay sang akon amay nga nagaestar sa Canaan.

³¹Silingon ko siya nga manugbantay kamo sang sapat, kag gindala gani ninyo ang inyo mga sapat kag ang tanan ninyo nga pagkabutang. ³²Gani kon ipatawag niya kamo kag pamangkuton kon ano ang inyo trabaho, ³³silingon ninyo nga manugbantay kamo sang sapat halin sang gagmay pa kamo pareho sang inyo mga ginikanan, para paestaron niya kamo sa Goshen. Kay nalainan ang mga taga-Egypt sa mga manugbantay sang sapat.”