Psalms 129

Often they have afflicted me

¹گۆرانی گەشتیاران. «لە گەنجییەتیم زۆر هەراسانیان کردم!» با ئێستا ئیسرائیل بڵێت: ²«لە گەنجییەتیم زۆر هەراسانیان کردم! بەڵام بەسەرمدا زاڵ نەبوون. ³جوتیارەکان جووتیان لەسەر پشتم کرد و هێڵی جووتەکانیان درێژکردەوە.»

⁴بەڵام یەزدان ڕاستودروستە، پەتی بەدکارانی پچڕاند. ⁵با هەموو ئەوانەی ڕقیان لە سییۆنە ڕیسوا بن و ببەزن. ⁶با بە دەردی گیای سەربان بچن، پێش ئەوەی گەشە بکات وشک دەبێت، ⁷ئەوەی نە دەستی دروێنەکەر پڕ دەکات و نە باوەشی گیشەکەر.

⁸با ئەوانەی بەلایانەوە تێدەپەڕن پێیان نەڵێن: «بەرەکەتی یەزدانتان لێ بێت! بە ناوی یەزدان داوای بەرەکەتتان بۆ دەکەین!»