Psalms 18

The Lord is my rock

Ang awit alang sa maestro sa mga mag-aawit. Ang awit ni David nga alagad sa Ginoo. Giawit niya kini ngadto sa Ginoo sa dihang giluwas siya sa Ginoo gikan kang Saulo ug sa uban pa niyang mga kaaway. Gihigugma ka nako Ginoo. Ikaw ang akong kusog. ²Ikaw, Ginoo, ang akong salipdanan nga bato, ang akong lig-ong tago-anan ug manluluwas. Ikaw, Dios, ang salipdanan ko nga bato, makatago ako diha kanimo. Ikaw, Dios, ang akong taming, gamhanang manluluwas ug dalangpanan. ³Dalaygon ka, Ginoo, kay kon mangayo ako ug tabang kanimo ginaluwas mo ako gikan sa akong mga kaaway.

⁴Ang kamatayon daw pisi nga milambod kanako ug daw lit-ag nga nag-atang sa akong agianan. Ang kalaglagan daw bul-og sa baha nga nagkuso-kuso kanako. ⁵Busa sa akong kalisdanan nagpakitabang ako kanimo, Ginoo, nga akong Dios, ug gikan sa imong templo gidungog mo ang akong pag-ampo. ⁶Unya milinog, ug ang mga pundasyon sa mga bukid nauyog, tungod kay nasuko ka, Ginoo.

⁷Nanggawas ang aso sa imong ilong, ug sa imong baba nanggawas ang nagdilaab nga kalayo ug mga baga. ⁸Giablihan mo ang langit ug nanaog ka nga nagtungtong sa mabagang dag-om. ⁹Nagsakay ka sa kerubin ug tulin kining milupad samtang gipalid sa hangin.

¹⁰Gihimo mo ang kangitngit nga mosalipod kanimo. Nagtago ka sa mabagang dag-om. ¹¹Nagpangilat sa imong atubangan, ug nag-ulan ug mga ice ug nagdilaab nga mga baga. ¹²Ang tingog mo Ginoo, nga Labing Halangdong Dios, nagdahunog gikan sa langit.

¹³Gipana mo ug kilat ang imong mga kaaway, ug miikyas sila nga nagkatibulaag. ¹⁴Sa imong pagngulob ug pagpangusmo sa kasuko mimala ang dagat, ug nakita ang yuta ilalom niini, ug nakita usab ang pundasyon sa kalibotan. ¹⁵Gikan sa langit gigunitan mo ako ug gihaw-as gikan sa lawom nga tubig.

¹⁶Giluwas mo ako gikan sa akong gamhanang mga kaaway nga naglagot kanako, kay wala akoy dag-anan kanila. ¹⁷Gisulong nila ako sa dihang anaa ako sa kalisod, apan gipanalipdan mo ako, Ginoo. ¹⁸Giluwas mo ako sa katalagman kay nalipay ka kanako.

¹⁹Gipanalanginan mo ako tungod kay matarong ang akong kinabuhi ug wala ako magpakasala. ²⁰Kay gisunod ko ang imong mga pamaagi ug wala ako mobiya kanimo, Ginoo, nga akong Dios. ²¹Gituman ko ang tanan mong sugo ug wala ko lapasa ang imong mga tulomanon.

²²Nahibalo ka nga walay ikasaway sa akong kinabuhi, ug gilikayan ko ang pagpakasala. ²³Gigantihan mo ako tungod kay nakita mo nga matarong ang akong kinabuhi ug wala ako magpakasala. ²⁴Matinumanon ka sa mga matinumanon kanimo, ug maayo ka usab sa mga tawo nga maayo.

²⁵Matinud-anon ka sa mga tawo nga matinud-anon kanimo, apan makigbatok ka sa mga tawong daotan. ²⁶Oo, ginaluwas mo ang mga mapainubsanon, apan ginapaubos mo ang mga mapahitas-on. ²⁷Ginoo nga akong Dios, ikaw ang akong kahayag. Sa kangitngit ikaw ang akong suga.

²⁸Sa imong tabang sulongon ko ang panon sa mga sundalo, ug mahimo kong katkaton ang paril nga naglibot sa lungsod. ²⁹Hingpit ang imong pamaagi, O Dios. Ang imong pulong kasaligan gayod. Sama ka sa taming alang sa tanang nagdangop kanimo. ³⁰Ikaw lang, Ginoo, nga Dios; ikaw lang ang among salipdanan nga Bato.

³¹Ikaw, O Dios, ang naghatag kanako ug kusog ug ang nagbantay sa akong paglakaw. ³²Ginalig-on mo ang akong tiil sama sa tiil sa lagsaw, aron makalatas ako sa habog nga mga dapit. ³³Ginabansay mo ako sa pagpakig-gira; ang akong mga bukton makabinat na sa bronsi nga pana.

³⁴Gipanalipdan mo ako sama sa taming, busa luwas ang akong kinabuhi. Gitipigan mo ako pinaagi sa imong gahom, ug pinaagi sa imong tabang nahimo akong bantogan. ³⁵Gipalapdan mo ang akong agianan, busa wala ako madakin-as. ³⁶Gigukod ko ang akong mga kaaway ug naapsan ko sila. Ug wala gayod ako mobalik hangtod nga nalaglag ko sila.

³⁷Gihampak ko sila hangtod nga nangalup-og sila sa akong tiilan ug dili na makabangon pa. ³⁸Gihatagan mo ako ug kusog sa pagpakig-gira ug gipadaog batok sa akong mga kaaway. ³⁹Gipakagiw mo ang akong mga kaaway ug gilaglag ko sila.

⁴⁰Nangayo sila ug tabang, apan walay miluwas kanila. Nanawag sila kanimo, apan wala mo sila tubaga. ⁴¹Gidugmok ko sila hangtod nahisama na lang sila sa abog nga paliron sa hangin. Gitunob-tunoban ko sila nga daw lapok sa kadalanan. ⁴²Giluwas mo ako gikan sa mga nagrebelde. Gihimo mo akong pangulo sa mga kanasoran. Ang mga langyaw nag-alagad kanako.

⁴³Nagyukbo sila kanako. Ug inigkadungog nila bahin kanako, nagtuman sila sa akong mando. ⁴⁴Nawad-an silag kaisog, ug nanggawas sa ilang mga tago-anan nga nagkurog sa kahadlok. ⁴⁵Buhi ka, Ginoo! Dalaygon ka nga akong salipdanan nga bato! Gibayaw ka nako tungod kay ikaw ang Dios nga akong Manluluwas.

⁴⁶Ikaw Ginoo ang manimalos sa akong mga kaaway, ug gipasakop mo kanako ang mga kanasoran. ⁴⁷Giluwas mo ako gikan sa akong mabangis nga mga kaaway, ug gipadaog mo ako batok kanila. ⁴⁸Busa pasidunggan ka nako taliwala sa mga kanasoran. Ug awitan ka nako ug mga pagdayeg.

⁴⁹Gihatagan mo ug dagkong mga kadaogan ang imong pinili nga hari. Gihigugma mo si David ug ang iyang mga kaliwat sa walay kataposan.