Psalms 105

Remember the wonders he has done

Pasalamati ninyo ang Ginoo; simbaha ninyo siya! Isugilon ngadto sa mga katawhan ang iyang mga binuhatan. ²Awiti ninyo siya ug mga pagdayeg; isugilon ang tanang katingalahan niyang mga buhat. ³Dayega ninyo ang iyang pagkabalaan. Paglipay kamong mga nagdangop kaniya.

⁴Salig kamo sa Ginoo ug sa iyang kusog. Dangop kamo kanunay kaniya. ⁵Kamong mga kaliwat ni Abraham nga alagad sa Dios, ug mga kaliwat usab ni Jacob nga mga pinili sa Dios, hinumdomi ninyo ang iyang katingalahang mga buhat, ang iyang mga milagro, ug ang iyang mga paghukom. ⁶Siya ang Ginoo nga atong Dios, ug naghukom siya sa tibuok kalibotan.

⁷Ginahinumdoman niya kanunay ang iyang kasabotan. Dili gayod niya pagkalimtan ang iyang saad hangtod sa kahangtoran. ⁸Kining kasabotan gihimo niya kang Abraham ug gisaad usab niya kang Isaac. ⁹Gilig-on niya kini ngadto kang Jacob, nga gitawag usab ug Israel, ug magpadayon kini hangtod sa kahangtoran.

¹⁰Miingon siya sa matag-usa kanila, “Ihatag ko kaninyo ang yuta sa Canaan ingon nga inyong panulondon.” ¹¹Kaniadto gamay pa lang kaayo ang katawhan sa Dios, ug mga dumuduong pa lang sila sa yuta sa Canaan. ¹²Naglatagaw sila sa mga kanasoran ug mga gingharian.

¹³Apan wala motugot ang Dios nga daog-daogon sila. Aron mapanalipdan sila, gibadlong niya ang mga hari. ¹⁴“Ayaw ninyo hilabti ang akong piniling mga alagad; ayaw ninyo pasipad-i ang akong mga propeta.” ¹⁵Sa dihang nagpadala ang Dios ug kagutom sa yuta sa Canaan, gihurot niyag kuha ang tanan nilang kuhaanan ug pagkaon.

¹⁶Apan gipauna na niyang daan si Jose, nga gibaligya ingon nga ulipon didto sa Ehipto. ¹⁷Gikadenahan ang iyang mga tiil ug gibutangan ug puthaw ang iyang liog, ¹⁸hangtod nga natuman ang iyang gitagna. Ang mensahe sa Ginoo kaniya nga natuman nagpamatuod nga matarong siya.

¹⁹Gibuhian siya sa hari sa Ehipto nga nangulo sa daghang katawhan, ²⁰ug gihimo siya nga tigdumala sa palasyo ug sa tanang kabtangan niini. ²¹Isip tigdumala, aduna siyay katungod sa pagbadlong sa mga opisyal sa hari, ug sa pagtudlo sa mga magtatambag niini.

²²Unya miadto si Jacob ug ang iyang panimalay sa Ehipto, ang yuta sa mga kaliwat ni Ham, ug didto sila namuyo. ²³Gipadaghan sa Ginoo ang iyang katawhan; mas daghan pa kay sa mga taga-Ehipto nga ilang mga kaaway. ²⁴Gitugot sa Ginoo nga kasilagan ug limbongan sa mga taga-Ehipto ang iyang katawhan nga iyang mga alagad.

²⁵Unya gipadala niya si Moises nga iyang alagad ug si Aaron nga iyang pinili. ²⁶Gipakita nila didto sa yuta sa mga kaliwat ni Ham ang katingalahang mga buhat sa Dios. ²⁷Gipangit-ngit sa Dios ang Ehipto; apan misupak gihapon ang mga taga-Ehipto sa iyang mga sugo.

²⁸Gihimo niyang dugo ang ilang mga tubig, busa nangamatay ang mga isda. ²⁹Napuno ug baki ang ilang yuta, bisan ang mga kuwarto sa ilang mga pangulo. ³⁰Sa pagmando sa Dios, napuno ug langaw ug lamok ang ilang yuta.

³¹Gipadad-an niya sila ug ulan nga ice ug kilat. ³²Gipangdaot niya ang ilang mga tanom nga ubas ug ang mga kahoy nga igos, ug ang uban pang mga kahoy. ³³Sa iyang pagmando, miabot ang mga dulon nga dili maihap sa kadaghan.

³⁴Ug gikaon niini ang tanang mga tanom sa ilang yuta apil na ang ilang mga anihon. ³⁵Gipamatay sa Dios ang tanan nilang mga kamagulangang anak nga lalaki. ³⁶Unya gipagawas niya ang mga Israelinhon gikan sa Ehipto nga wala maunsa, ug aduna pay dala nga mga pilak ug mga bulawan.

³⁷Nalipay ang mga taga-Ehipto sa pagbiya sa mga Israelinhon, tungod kay nahadlok sila kanila. ³⁸Sa panahon sa paglakaw sa mga Israelinhon, nagbutang ang Dios ug panganod sa paghatag ug landong kanila, ug kalayo sa paghatag kanila ug kahayag sa panahon sa kagabhion. ³⁹Nangayo sila ug pagkaon, ug gipadad-an sila sa Dios ug mga buntog, ug gibusog niya sila sa pagkaon nga gikan sa langit.

⁴⁰Gibuak niya ang bato ug mibugwak ang tubig. Midagayday kini sa disyerto sama sa suba. ⁴¹Gihimo kining tanan sa Dios kay wala niya kalimti ang iyang saad kang Abraham nga iyang alagad. ⁴²Gipagawas niya gikan sa Ehipto nga malipayon ug naghugyaw sa kalipay ang katawhan nga iyang pinili.

⁴³Ug gihatag niya kanila ang mga yuta nga gipanag-iyahan sa ubang mga katawhan; gipanunod nila ang hinagoan sa uban. ⁴⁴Gihimo kini sa Dios aron tumanon nila ang iyang mga tulomanon ug mga kasugoan. Dayega ang Ginoo!