Job 33

God speaks in more than one way

“Karon, Job, pamatia pag-ayo ang tanan kong isulti kanimo. ²Kasultion na kaayo ako; anaa na sa tumoy sa akong dila ang akong isulti. ³Mosulti ako gikan sa matinud-anon kong kasing-kasing. Isulti ko ang akong nahibaloan sa kinasing-kasing.

⁴Ang espiritu sa Makagagahom nga Dios maoy naghimo kanako ug naghatag kanakog kinabuhi. ⁵Tubaga ako, kon makahimo ka. Pangandam sa imong mga katarungan ug barogi kini. ⁶Sama ra ako kanimo atubangan sa Dios. Giumol usab ako gikan sa yuta.

⁷Busa ayaw kahadlok kanako o paghuna-huna nga lisod-lisoron ka nako. ⁸“Klaro kanako ang imong gipanulti. Miingon ka, ⁹‘Wala akoy sala; hinlo ako ug inosente.

¹⁰Apan nangitag rason ang Dios aron iya akong paantuson. Giisip niya akong iyang kaaway. ¹¹Gikadenahan niya ang akong mga tiil; gibantayan niya ang tanan kong mga lihok.’ ¹²“Apan Job, sayop ka gayod sa imong gisulti. Dili ba nga ang Dios labaw man sa tawo?

¹³Nan, nganong ginaakusaran mo siya nga wala niya ginatubag ang reklamo sa mga tawo? ¹⁴Ang tinuod, nagsulti kanunay ang Dios, apan wala lang makamatikod niini ang tawo. ¹⁵Nagsulti siya pinaagi sa damgo samtang natulog ug nahinanok ang tawo sa gabii. Mohunghong siya kanila sa mga pasidaan nga makapahadlok kanila.

¹⁶Ginahimo niya kini aron moundang ang tawo sa pagpakasala ug pagpasigarbo, ¹⁷ug aron maluwas siya gikan sa kamatayon. ¹⁸“Usahay disiplinahon sa Dios ang tawo pinaagi sa sakit diin mag-antos siya, sama sa walay hupay nga panakit sa kabukogan, ¹⁹nga makapawala sa gana sa pagkaon, bisan pag lamian kaayo ang pagkaon.

²⁰Moniwang ang tawo, hangtod manggawas na ang mga bukog. ²¹Himalatyon na siya ug moadtoay na sa dapit sa mga patay. ²²“Apan kon adunay usa lang sa linibo ka mga anghel nga mopataliwala kaniya ug sa Dios, ug mopahinumdom kaniya kon unsa ang husto ug angayan kaniya, ²³kaloy-an siya sa Dios. Moingon ang Dios, ‘Luwasa siya sa kamatayon. Nakakita ako ug pantubos kaniya.’ ²⁴Unya mobalik ang maayo niyang lawas. Molig-on siya pag-usab sama niadtong batan-on pa siya.

²⁵Kon mag-ampo siya ngadto sa Dios, motubag ang Dios kaniya. Dawaton siya sa Dios nga malipayon, ug ibalik siya sa Dios sa matarong nga pagkinabuhi. ²⁶Unya mosulti siya sa mga tawo, ‘Nakasala ako, ug naghimog dili maayo, apan wala ko madawat ang silot nga angay unta kanako. ²⁷Giluwas niya ako sa kamatayon, ug padayon akong magkinabuhi.’ ²⁸“Oo, kanunay kining gihimo sa Dios ngadto sa tawo.

²⁹Ginaluwas niya ang tawo sa kamatayon aron mabuhi siya. ³⁰“Job, pamatia ako pag-ayo. Paghilom lang, ug pasagdi ako nga mosulti. ³¹Kon aduna ka pay isulti, sulti lang, kay gusto kong mahibaloan kon tinuod ba nga wala kay sala.

³²Apan kon wala kay isulti, hilom lang ug pamati sa akong kaalam.”