Job 23

If only I could find him

Unya miingon si Job, ²“Hangtod karon labihan gayod ang akong reklamo. Ginapaantos pa gayod ako sa Dios bisan pa sa akong pag-agulo. ³Kon nahibalo pa lang unta ako kon asa ko siya makita; kon makaadto pa lang unta ako sa iyang gipuy-an, ⁴ipresentar ko gayod kaniya ang akong reklamo ug isulti ko ang akong mga katarungan.

⁵Gusto kong mahibaloan kon unsay itubag niya kanako, ug gusto kong makasabot sa iyang isulti. ⁶Makiglalis kaha siya kanako ginamit ang iyang gahom? Siyempre dili! Pamation niya ang akong isulti. ⁷Ang tawong matarong nga sama kanako makapangatarongan atubangan sa Dios nga akong Maghuhukom, ug mopabor siya kanako.

⁸“Gipangita ko ang Dios, sa sidlakan, sa kasadpan, sa amihan, ug sa habagatan, apan wala ko siya makita. ⁹Apan nahibaloan niya ang akong ginahimo. Kon sulayan niya ako, makita niya nga putli ako sama sa purong bulawan. ¹⁰Gisunod ko ang iyang mga pamaagi, ug wala gayod ako mosimang niini.

¹¹Ginatuman ko kanunay ang iyang tulomanon, ug gitipigan ko kini sa akong kasing-kasing. ¹²“Apan makapagusto ang Dios sa iyang ginabuhat; walay makababag kaniya. Buhaton niya kon unsay iyang gustong buhaton. ¹³Busa buhaton niya ang iyang giplano nga buhaton kanako, ug daghan pa ang iyang giandam alang kanako.

¹⁴Mao gani nga nahadlok ako kaniya. Kon huna-hunaon ko kini, malisang gayod ako. ¹⁵Gipaluya ug gihadlok ako sa Dios nga Makagagahom. ¹⁶Apan wala ako moundang sa pagreklamo bisan ug daw sa gitabonan ako sa labihan nga kangitngit.