2 Samuel 22

The song of deliverance

Nag-awit si David ngadto sa Ginoo sa dihang giluwas siya sa Ginoo gikan sa iyang mga kaaway ug kang Saulo. ²Mao kini ang iyang awit: “Ang Ginoo ang akong salipdanan nga bato, ang akong lig-ong tago-anan ug manluluwas. Ingon nga salipdanan nga bato, makatago ako kanimo. Siya ang akong taming ug gamhanan nga manluluwas. Ang Ginoo ang akong dalangpanan ug tago-anan. ang nagluwas kanako gikan sa bangis nga mga tawo. ³Angay nga dayegon ang Ginoo, kay kon mangayo ako ug tabang kaniya ginaluwas niya ako gikan sa akong mga kaaway.

⁴Ang kamatayon daw balod nga mikuso-kuso kanako. Ang kalaglagan daw sulog sa baha nga mianod kanako. ⁵Ang kamatayon daw pisi nga milambod kanako ug daw lit-ag nga nag-atang sa akong agianan. ⁶Sa akong kalisdanan nagpakitabang ako sa Ginoo, nga akong Dios, ug gidungog niya ang akong pag-ampo didto sa iyang templo.

⁷“Unya milinog, ug ang mga pundasyon sa mga bukid nauyog, tungod kay nasuko ang Ginoo. ⁸Nanggawas ang aso sa iyang ilong, ug sa iyang baba nanggawas ang nagdilaab nga kalayo ug mga baga. ⁹Giablihan niya ang langit, ug nanaog siya nga nagtungtong sa mabagang dag-om.

¹⁰Nagsakay siya sa kerubin, ug tulin kining milupad samtang gipalid sa hangin. ¹¹Gihimo niya ang kangitngit nga mosalipod kaniya. Nagtago siya sa mabagang dag-om. ¹²Gikan sa kahayag diha sa iyang atubangan, nanggawas ang nagdilaab nga mga baga.

¹³Ang tingog sa Ginoo, nga Labing Halangdong Dios, nagdahunog gikan sa langit. ¹⁴Gipana niya ug kilat ang iyang mga kaaway ug miikyas sila nga nagkatibulaag. ¹⁵Sa iyang pagngulob ug pagpangusmo sa kasuko mimala ang dagat, ug nakita ang yuta ilalom niini, ug nakita usab ang pundasyon sa kalibotan.

¹⁶Gikan sa langit gigunitan niya ako ug gihaw-as gikan sa lawom nga tubig. ¹⁷Giluwas niya ako gikan sa akong gamhanang mga kaaway nga naglagot kanako, kay wala akoy dag-anan kanila. ¹⁸Gisulong nila ako sa dihang anaa ako sa kalisod, apan gipanalipdan ako sa Ginoo.

¹⁹Giluwas niya ako sa katalagman kay nalipay siya kanako. ²⁰Gipanalanginan niya ako tungod kay matarong ang akong kinabuhi ug wala ako magpakasala. ²¹Kay gisunod ko ang iyang mga pamaagi ug wala ako mobiya sa Ginoo, nga akong Dios.

²²Gituman ko ang tanan niyang sugo ug wala ko lapasa ang iyang mga tulomanon. ²³Nahibalo siya nga walay ikasaway sa akong kinabuhi ug gilikayan ko ang pagpakasala. ²⁴Gigantihan niya ako tungod kay nakita niya nga matarong ang akong kinabuhi ug wala akoy nahimong sala.

²⁵Matinumanon ka sa mga matinumanon kanimo, ug maayo ka usab sa mga tawo nga maayo. ²⁶Matinud-anon ka sa mga tawo nga matinud-anon kanimo, apan makigbatok ka sa mga tawong daotan. ²⁷Oo, ginaluwas mo ang mga mapainubsanon, apan ginapaubos mo ang mga mapahitas-on.

²⁸“Ginoo, ikaw ang akong kahayag. Sa kangitngit, ikaw ang akong suga. ²⁹Sa imong tabang sulongon ko ang panon sa mga sundalo ug mahimo kong katkaton ang paril. ³⁰Hingpit ang pamaagi sa Dios. Ang pulong sa Ginoo kasaligan gayod. Sama siya sa taming alang sa tanang nagdangop kanimo.

³¹Kay kinsa man ang Dios gawas sa Ginoo? Ug kinsa man ang among salipdanan nga bato gawas sa among Dios? ³²Ang Dios ang naghatag kanako ug kusog ug ang nagbantay sa akong paglakaw. ³³Ginalig-on niya ang akong tiil sama sa tiil sa usa, aron makalatas ako sa habog nga mga dapit.

³⁴Ginabansay niya ako sa pagpakig-gira. Ang akong mga bukton makabinat na sa bronsi nga pana. ³⁵Sama ikaw sa taming nga nagpanalipod kanako, ug pinaagi sa imong tabang nahimo akong bantogan. ³⁶Gipalapdan mo ang akong agianan, busa wala ako madakin-as.

³⁷Gigukod ko ang akong mga kaaway ug napildi ko sila. Ug wala gayod ako mobalik hangtod nga nalaglag ko sila. ³⁸Gilaglag ko sila hangtod nga nangalup-og sila sa akong tiilan ug dili na makabangon pa. ³⁹Gihatagan mo ako ug kusog sa pagpakig-gira ug gipadaog batok sa akong mga kaaway.

⁴⁰Gipakagiw mo ang akong mga kaaway ug gilaglag ko sila. ⁴¹Nangayo sila ug tabang, apan walay miluwas kanila. Nangayo sila ug tabang kanimo, apan wala mo sila tubaga. ⁴²Gidugmok ko sila hangtod nahisama na lang sila sa abog. Gitunob-tunoban ko sila nga daw lapok sa kadalanan.

⁴³Giluwas mo ako gikan sa mga nagrebelde kong katawhan. Gihimo mo akong pangulo sa mga kanasoran. Ang mga langyaw nag-alagad kanako. ⁴⁴Nagyukbo sila kanako, ug inigkadungog nila bahin kanako, nagtuman sila sa akong mando. ⁴⁵Nawad-an silag kaisog, ug nanggawas sa ilang mga tago-anan nga nagkurog sa kahadlok.

⁴⁶Buhi ka, Ginoo! Dalaygon ka nga akong salipdanan nga Bato! Gibayaw ka nako tungod kay ikaw ang Dios nga akong Manluluwas. ⁴⁷Siya ang Dios nga nanimalos sa akong mga kaaway ug gipasakop niya kanako ang mga kanasoran. ⁴⁸Ginaluwas niya ako gikan sa akong mabangis nga mga kaaway, ug ginapadaog niya ako batok kanila.

⁴⁹Busa pasidunggan ka nako taliwala sa mga kanasoran, O Ginoo. Ug awitan ka nako ug mga pagdayeg. ⁵⁰Gihatagan mo ug dagkong mga kadaogan ang imong pinili nga hari. Gihigugma mo si David ug ang iyang mga kaliwat sa walay kataposan.”