Psalms 147

He counts the number of the stars

Haleloia; Fa tsara ny mihira ho an’ Andriamanitsika; Eny, mamy sady mendrika ny fiderana. ²Manangana an’ i Jerosalema Jehovah; Mamory ny Isiraely voaroaka Izy. ³Mahasitrana ny torotoro fo Izy Sy mamehy ny feriny.

⁴Milaza ny isan’ ny kintana Izy: Samy tononiny amin’ ny anarany ireny rehetra ireny. ⁵Lehibe ny Tompontsika sady be hery; Tsy hita lany ny fahalalany. ⁶Manandratra ny mpandefitra Jehovah, Fa mampietry ny ratsy fanahy hatramin’ ny tany.

⁷Mihirà fiderana ho an’ i Jehovah; Mankalazà an’ Andriamanitsika amin’ ny lokanga, ⁸Izay manaron-drahona ny lanitra, Izay mamboatra ranonorana ho amin’ ny tany, Izay mampaniry ahitra ny tendrombohitra, ⁹Manome hanina ho an’ ny biby Izy Sy ho an’ ny zana-goaika izay mitaraina.

¹⁰Tsy ny herin’ ny soavaly no mahafinaritra Azy, Ary tsy ny tongotry ny olona no sitrany. ¹¹Jehovah mankasitraka izay matahotra Azy, Dia izay manantena ny famindram-pony. ¹²Mankalazà an’ i Jehovah, ry Jerosalema ô; Miderà an’ Andriamanitrao, ry Ziona ô.

¹³Fa manamafy ny hidim-bavahadinao Izy, Sady mitahy ny zanakao eo afovoanao. ¹⁴Mahatonga ny fari-taninao ho fiadanana Izy; Vokisany vary tsara indrindra ianao. ¹⁵Mampandeha ny didiny ho amin’ ny tany Izy; Miely faingana dia faingana ny teniny.

¹⁶Mandatsaka oram-panala tahaka ny landihazo Izy; Mampiely fanala tahaka ny lavenona Izy. ¹⁷Mandatsaka ny havandrany ta-haka ny sombintsombin-javatra Izy; Iza no maharitra ny hatsiakany? ¹⁸Mamoaka ny teniny Izy ka mampiempo ireny; Mampifofofofo ny rivony Izy, dia mandriaka ny rano.

¹⁹Milaza ny teniny amin’ i Jakoba Izy Ary ny didiny sy ny fitsipiny amin’ Isiraely. ²⁰Tsy nanao toy izany tamin’ izay firenena hafa Izy; Ary ny fitsipiny tsy mba fantatr’ ireny. Haleloia.