Psalmen 116

Ich liebe den HERRN, denn er hörte mich

Ngiyamthanda uThixo ngoba walizwa ilizwi lami; wezwa ukukhala kwami ngicela umusa. ²Ngoba wangipha indlela yakhe, ngizambiza kokuphela nxa ngisaphila. ³Izibopho zokufa zangithandela, ubuhlungu obukhulu bengcwaba bangehlela; ngagajelwa yikuhlupheka losizi.

⁴Ngasengibiza ibizo likaThixo : “Oh Thixo ake ungisindise!” ⁵UThixo ulomusa njalo ulungile; uNkulunkulu wethu ulesihawu. ⁶UThixo uvikela abalenhliziyo ethobekileyo; ngathi ngihluphekile kakhulu wangisindisa.

⁷Phumula njalo, we mphefumulo wami, ngoba uThixo ukwenzile ukulunga. ⁸Ngoba wena Thixo, uwukhulule umphefumulo wami ekufeni, amehlo ami ezinyembezini, lezinyawo zami azaze zakhubeka, ⁹ukuze ngihambe phambi kukaThixo elizweni labaphilayo.

¹⁰Ngathembela kuThixo; ngakho ngasengisithi, “Ngiyahlupheka kakhulu.” ¹¹Ngiphakathi kokulahla ithemba ngathi, “Bonke abantu balamanga.” ¹²Ngingambonga ngani uThixo ngabo bonke ubuhle bakhe kimi?

¹³Ngizayiphakamisa inkezo yensindiso ngimemeze ibizo likaThixo. ¹⁴Ngizazigcwalisa izifungo zami kuThixo phambi kwabo bonke abantu bakhe. ¹⁵Kuligugu emehlweni kaThixo ukufa kwabathembekileyo bakhe.

¹⁶Oh Thixo, ngempela ngiyinceku Yakho, indodana yencekukazi yakho; usungikhulule emaketaneni ami. ¹⁷Ngizakwenzela umhlatshelo womnikelo wokubonga ngilibize ibizo likaThixo ¹⁸Ngizazigcwalisa izifungo zami kuThixo phambi kwabo bonke abantu bakhe, ¹⁹emagumeni endlu kaThixo phakathi kwakho, wena Jerusalema. Dumisani uThixo.