Sprüche 2

Suche Weisheit wie verborgenen Schatz

Anak, dawata ug tipigi sa imong kasing-kasing ang akong mga gipanudlo ug mga sugo. ²Paminawa kon unsay makahatag ug kaalam ug pagsabot. ³Ug paningkamoti gayod nga makaangkon ka niini, ⁴nga daw sama nga nangita kag pilak o tinagong bahandi.

⁵Kon himuon mo kini, masayran mo kon unsa ang pagtahod sa Ginoo, ug masabtan mo ang mahitungod sa Dios. ⁶Kay ang Ginoo maoy naghatag ug kaalam. Kaniya usab naggikan ang kahibalo ug pagsabot. ⁷Gipanalipdan niya ang nagkinabuhing matarong, matinumanon, ug dili salawayon. Giandaman usab niya sila ug kadaogan.

⁸Kon mamati ka kanako, masayran mo kon unsa ang maayo mong buhaton: ang husto, matarong, ug ang angayng buhaton. ⁹Mahimo kang maalamon, ug makahatag kinig kalipay kanimo. ¹⁰Kon aduna kay panabot ug kahibalo nga modesisyon ug ensakto, makasalbar kini kanimo ¹¹ug maglikay sa daotang binuhatan ug sa mga tawong daotan ug sinultihan.

¹²Kini nga mga tawo mibiya na sa hustong binuhatan ug misunod sa buhat sa mga anaa sa kangitngit. ¹³Nalipay sila sa paghimo ug daotan, ug nalingaw sila sa kangil-ad niini. ¹⁴Dili ensakto ang ilang pagkinabuhi; sukwahi ang dalan nga ilang ginaagian.

¹⁵Ang kaalam maglikay usab kanimo sa babayeng daotan nga buot motintal kanimo pinaagi sa matam-is niyang mga pulong. ¹⁶Kining babayhana mibiya sa iyang bana nga iyang giminyoan sa batan-on pa siya; gikalimtan niya ang iyang saad sa Dios sa dihang gikasal siya. ¹⁷Ang pag-adto sa iyang balay sama ra nga nagpaingon ka sa kamatayon. Ang dalan paingon sa iyang balay padulong sa dapit sa mga patay.

¹⁸Si bisan kinsa nga moadto kaniya dili na makauli; dili na niini matultolan pa ang dalan paingon sa dapit sa mga buhi. ¹⁹Busa sunda ang pagkinabuhi sa maayo nga mga tawo; pagkinabuhi nga matarong. ²⁰Kay ang tawo nga nagkinabuhi sa ensakto ug dili salawayon padayon nga magpuyo dinhi sa atong yuta.

²¹Apan ang mga daotan ug maluibon abugon. Pang-ibton sila sama sa mga sagbot.