Psalmen 84

Wie lieblich sind deine Wohnungen

Кіраўніку хору: на лад Гітыт. Сыноў Караха. Псальм. ²Як умілаваныя сялібы Твае, ГОСПАД Магуцьцяў! ³Прагне і тужыць душа мая па панадворках ГОСПАДА; сэрца маё і цела маё весяляцца ў Богу Жывым.

⁴Нават птушка адшукала дом, ластаўка — гняздо для сябе, дзе птушанятак сваіх укладае: каля ахвярнікаў Тваіх, ГОСПАД Магуцьцяў, Валадар мой і Бог мой! ⁵Шчасьлівыя тыя, што жывуць у Доме Тваім, заўсёды яны [ўзносяць] хвалу Табе. (Сэлях) ⁶Шчасьлівы чалавек, сіла якога ў Табе, і ў сэрцы якога дарога [да Цябе]!

⁷Праходзячы далінаю дрэваў бальзамовых, яны адкрываюць крыніцы, і дождж раньні пакрывае яе дабраслаўленьнем. ⁸Ідуць яны ад сілы да сілы, і прыходзяць да Бога на Сыён. ⁹ГОСПАДЗЕ, Божа Магуцьцяў, пачуй малітву маю! Прыхілі вуха, Божа Якуба! (Сэлях) ¹⁰Божа, шчыце наш! Зірні і паглядзі на аблічча памазанца Твайго!

¹¹Бо [адзін] дзень на панадворку Тваім лепшы за тысячу [іншых]; я выбіраю стаяць каля парога ў Доме Божым, чым жыць у намётах беззаконьня. ¹²Бо ГОСПАД Бог ёсьць сонца і шчыт; ГОСПАД дае ласку і славу, і не адмовіць дабра аніякага тым, якія ў беззаганнасьці ходзяць. ¹³ГОСПАД Магуцьцяў! Шчасьлівы чалавек, які на Цябе спадзяецца!