Markus 13

Der Tempel wird zerstört

І калі выходзіў Ён са сьвятыні, гаворыць Яму адзін з вучняў Ягоных: «Настаўнік, паглядзі, якія камяні ды якія пабудовы!» ²А Ісус, адказваючы, сказаў яму: «Бачыш усе гэтыя вялізарныя пабудовы? Не застанецца камяня на камяні, які б ня быў зруйнаваны». ³І калі Ён сядзеў на гары Аліўнай насупраць сьвятыні, спыталіся ў Яго насамоце Пётар, і Якуб, і Ян, і Андрэй: ⁴«Скажы нам, калі гэта станецца, і які знак, калі ўсё гэта мае скончыцца?»

⁵Ісус, адказваючы ім, пачаў гаварыць: «Глядзіце, каб вас хто не падмануў. ⁶Бо многія прыйдуць пад імем Маім, кажучы, што гэта Я, і многіх падмануць. ⁷А калі пачуеце пра войны і чуткі ваенныя, не трывожцеся, бо ўсё гэта павінна стацца, але гэта яшчэ не канец.

⁸Бо паўстане народ на народ, і валадарства на валадарства, і будуць месцамі землятрусы, і будуць голад і замяшаньні. Гэта пачатак мукаў радзін.

Vor die Behörden gebracht

⁹Глядзіце ж і вы самі, бо будуць вас выдаваць у сынэдрыёны і біць у сынагогах, і будзеце пастаўленыя перад ваяводамі і валадарамі дзеля Мяне на сьведчаньне ім. ¹⁰І ўсім народам павінна спачатку быць абвешчана Эвангельле. ¹¹І калі павядуць вас, каб выдаць, не клапаціцеся наперад, што маеце гаварыць, і не абдумвайце, але што дадзена вам будзе ў гэты час, тое кажыце, бо ня вы будзеце гаварыць, але Дух Сьвяты.

¹²І выдасьць брат брата на сьмерць, і бацька сына; і дзеці паўстануць супраць бацькоў і будуць забіваць іх, ¹³і будзеце вы ў нянавісьці ў-ва ўсіх дзеля імя Майго. Але хто вытрывае да канца, будзе збаўлены.

Tage großer Bedrängnis

¹⁴А калі ўбачыце агіду спусташэньня, як сказана праз Данііла прарока, што стане там, дзе не павінна, — хто чытае, няхай разумее, — тады тыя, хто ў Юдэі, няхай уцякаюць у горы, ¹⁵а хто на даху, няхай не зыходзіць у дом і не ўваходзіць узяць нешта з дому свайго, ¹⁶і хто ў полі, няхай не вяртаецца назад узяць адзеньне сваё.

¹⁷Але гора цяжарным і тым, што кормяць грудзьмі, у тыя дні. ¹⁸Дык маліцеся, каб не былі ўцёкі вашыя ў зіму. ¹⁹Бо ў тыя дні будзе такі прыгнёт, якога не было ад пачатку стварэньня, якое стварыў Бог, аж дагэтуль, і ня будзе.

²⁰І калі б Госпад не скараціў гэтых дзён, не выратавалася б ніводнае цела, але дзеля выбраных, якіх Ён выбраў, скараціў гэтыя дні. ²¹І тады, калі хто вам скажа: “Вось тут Хрыстос”, ці: “Вось, там”, — ня верце. ²²Бо паўстануць фальшывыя хрысты і фальшывыя прарокі, і будуць рабіць знакі і цуды, каб зьвесьці, калі магчыма, і выбраных.

²³Вы ж глядзіце: вось, Я вам усё наперад сказаў.

Das Kommen des Menschensohnes

²⁴Але ў тыя дні, пасьля прыгнёту таго, зацьмее сонца, і месяц ня дасьць сьвятла свайго, ²⁵і зоркі нябесныя падаць будуць, і сілы, што ў небе, захістаюцца. ²⁶І тады ўгледзяць Сына Чалавечага, Які прыходзіць на аблоках з вялікай моцаю і славаю.

²⁷І тады Ён пашле анёлаў Сваіх, і зьбярэ выбраных Сваіх ад чатырох вятроў, ад краю зямлі да краю неба.

Das Gleichnis vom Feigenbaum

²⁸У дрэва фігавага навучыцеся прыповесьці: калі ўжо галінка ягоная робіцца мяккай і пускае лісты, разумееце, што блізка лета. ²⁹Гэтак і вы, калі ўбачыце, што гэта адбываецца, разумейце, што блізка, у дзьвярах. ³⁰Сапраўды кажу вам: не праміне пакаленьне гэтае, аж усё гэта станецца.

³¹Неба і зямля прамінуць, але словы Мае не прамінуць.

Wacht

³²А пра дзень той і гадзіну ніхто ня ведае, ані анёлы, якія ў небе, ані Сын, а толькі Айцец. ³³Глядзіце, ня сьпіце і маліцеся, бо ня ведаеце, калі прыйдзе пара. ³⁴Як чалавек, які, выяж­джаючы, пакінуў дом свой, і даў уладу слугам сваім, і кожнаму свой абавязак, і загадаў прыдзьверніку, каб чуваў.

³⁵Дык чувайце, бо ня ведаеце, калі гаспадар дому прыйдзе: вечарам, ці апоўначы, ці як певень засьпявае, ці раніцай, ³⁶каб, калі вернецца неспадзявана, не знайшоў вас, што сьпіцё. ³⁷А што вам кажу, усім кажу: "Чувайце!"»