Lukas 18

Die beharrliche Witwe

Сказаў таксама ім прыповесьць пра тое, што трэба заўсёды маліцца і не журыцца, ²кажучы: «У адным горадзе быў судзьдзя, які Бога не баяўся і людзей не саромеўся. ³У тым жа горадзе была ўдава, і яна прыходзіла да яго, кажучы: “Абарані мяне ад супраціўніка майго”.

⁴І ён доўгі час не хацеў. А пасьля сказаў сам сабе: “Хоць я і Бога не баюся, і людзей не саромеюся, ⁵але, як гэтая ўдава дакучае мне, абараню яе, каб яна, прыходзячы бясконца, ня вымучыла мяне”». ⁶І сказаў Госпад: «Чуеце, што кажа судзьдзя няправедны?

⁷А Бог ці ж не абароніць выбраных Сваіх, якія клічуць да Яго дзень і ноч, і будзе доўгацярплівым, [ня слухаючы] іх? ⁸Кажу вам, што хутка абароніць іх. Але Сын Чалавечы, прыйшоўшы, ці знойдзе веру на зямлі?»

Der Pharisäer und der Zöllner

⁹Сказаў жа і да тых, якія былі пэўныя адносна сябе, што яны праведнікі, і пагарджалі іншымі, гэткую прыповесьць: ¹⁰«Два чалавекі ўвайшлі ў сьвятыню памаліцца: адзін — фарысэй, а другі — мытнік. ¹¹Фарысэй, стаўшы, гэтак маліўся за сябе: “Божа, дзякую Табе, што я не такі, як іншыя людзі: рабаўнікі, няправеднікі, чужаложнікі, або як гэты мытнік.

¹²Пошчу два разы на ты­дзень, даю дзесяціну з усяго, што прыдбаю”. ¹³А мытнік, стаўшы здалёк, не хацеў нават падняць вачэй у неба, але біў сябе ў грудзі, кажучы: “Божа! Будзь міласьцівы да мяне, грэшніка”. ¹⁴Кажу вам, што гэты пайшоў апраўданым у дом свой, а ня той: бо ўсякі, хто сябе ўзвышае, будзе паніжаны, а хто сябе паніжае, будзе ўзвышаны».

Jesus segnet die Kinder

¹⁵Прыносілі да яго і немаўлят, каб Ён дакрануўся да іх. Убачыўшы гэтае, вучні сварыліся на іх. ¹⁶А Ісус, паклікаўшы іх, сказаў: «Дазвольце дзецям прыходзіць да Мяне і не забараняйце ім, бо гэткіх ёсьць Валадарства Божае. ¹⁷Сапраўды кажу вам: Хто ня прыйме Валадарства Божага, як дзіця, той ня ўвойдзе ў яго».

Der Reiche, der nicht loslassen konnte

¹⁸І спытаўся ў Яго нехта з начальнікаў, кажучы: «Настаўнік добры! Што мне рабіць, каб успадкаеміць жыцьцё вечнае?» ¹⁹А Ісус сказаў яму: «Чаму гаворыш Мне “добры”? Ніхто ня добры, акрамя аднаго Бога. ²⁰Ведаеш прыказаньні: “Не чужалож”, “не забівай”, “не крадзі”, “ня сьведчы фальшыва”, “шануй бацьку твайго і маці тваю”».

²¹Ён жа сказаў: «Усё гэта я захоўваў ад юнацтва майго». ²²Пачуўшы гэтае, Ісус сказаў яму: «Яшчэ аднаго не хапае табе: усё, што маеш, прадай, і раздай убогім, і будзеш мець скарб у небе; і прыходзь, ідзі за Мною». ²³Ён жа, пачуўшы гэта, стаўся смутным, бо быў надта багаты.

²⁴Убачыўшы, што ён стаўся смутным, Ісус сказаў: «Як цяжка таму, хто мае багацьце, увайсьці ў Валадарства Божае. ²⁵Бо лягчэй вярблюду прайсьці праз іголчына вушка, чым багатаму ўвайсьці ў Валадарства Божае». ²⁶А тыя, што чулі, сказалі: «І хто ж можа быць збаўленым?»

²⁷Ён жа сказаў: «Немагчымае для людзей магчыма для Бога». ²⁸А Пётар сказаў: «Вось, мы пакінулі ўсё і пайшлі за Табою». ²⁹Ён жа сказаў ім: «Сапраўды кажу вам: няма нікога, хто, пакінуўшы дом, або бацькоў, або братоў, або жонку, або дзяцей дзеля Валадарства Божага, ³⁰не атрымаў бы шмат больш у гэты час, а ў веку будучым — жыцьцё вечнае».

Jesus kündigt seinen Tod zum dritten Mal an

³¹Узяўшы ж Дванаццаць, сказаў ім: «Вось, мы ўзыходзім у Ерусалім, і зьдзейсьніцца ўсё, напісанае праз прарокаў пра Сына Чалавечага, ³²бо Ён будзе выдадзены паганам, і будуць зьдзеквацца, і зьневажаць, і пляваць [на Яго], ³³і, бічаваўшы, заб’юць Яго, і на трэці дзень Ён уваскрэсьне».

³⁴І яны нічога з гэтага не зразумелі; і словы гэтыя былі схаванымі для іх, і яны не ра­зумелі таго, што гаварылася.

Der blinde Bettler bei Jericho

³⁵І сталася, як набліжаўся Ён да Ерыхону, нейкі сьляпы сядзеў ля дарогі, жабруючы. ³⁶Пачуўшы, што праходзіць натоўп, ён спытаўся: «Што гэта такое?» ³⁷Яму паведамілі, што Ісус з Назарэту ідзе.

³⁸І закрычаў ён, кажучы: «Ісусе, Сыне Давідаў, зьлітуйся нада мною!» ³⁹І тыя, што ішлі наперадзе, сварыліся на яго, каб маўчаў, а ён яшчэ мацней закрычаў: «Сыне Давідаў, зьлітуйся нада мною!» ⁴⁰Ісус, спыніўшыся, загадаў прывесьці яго да Сябе. І калі той падыйшоў, спытаўся ў яго, ⁴¹кажучы: «Што ты хочаш, каб Я ўчыніў?» Той сказаў: «Госпадзе, каб мне глядзець».

⁴²І сказаў яму Ісус: «Глядзі! Вера твая збавіла цябе». ⁴³І ён адразу стаў бачыць, і пайшоў за Ім, славячы Бога. І ўвесь народ, бачачы гэтае, аддаў хвалу Богу.