1 Chronik 11

David wird König

І сабраўся ўвесь Ізраіль да Давіда ў Хеўрон, кажучы: «Вось, мы — косткі твае і цела тваё. ²І ўчора, і пазаўчора, і за жыцьця Саўла валадара ты выводзіў і ўводзіў Ізраіль, і ГОСПАД, Бог твой, сказаў табе: “Ты будзеш пасьвіць народ Мой, Ізраіль, і ты будзеш правадыром над народам Маім Ізраілем”». ³І прыйшлі ўсе старшыні Ізраіля да валадара ў Хеўрон, і заключыў Давід запавет у Хеўроне перад абліччам ГОСПАДА; і яны памазалі Давіда на валадара над Ізраілем паводле слова ГОСПАДА праз Самуэля.

David erobert Jerusalem

⁴І пайшоў Давід і ўвесь Ізраіль да Ерусаліму, гэта [значыць] Евусу. І там [былі] Евусэі, жыхары зямлі той. ⁵І сказалі жыхары Евусу Давіду: «Ты ня ўвойдзеш сюды». Але Давід здабыў крэпасьць Сыён, гэта горад Давіда. ⁶І сказаў Давід: «Той, хто першы паб’е Евусэяў, будзе галоўным і князем». І ўзыйшоў першым Ёаў, сын Цэруі, і стаў галоўным.

⁷І жыў Давід у крэпасьці, дзеля гэтага назвалі яе горадам Давіда. ⁸І ён забудаваў горад навокал, ад Міло і навокал, а Ёаў аднавіў рэшту гораду. ⁹І хадзіў Давід у моцы, і дужэў, і ГОСПАД Магуцьцяў [быў] з ім.

Die Helden Davids

¹⁰І вось галоўныя, якія [былі] з волатаў Давіда, і якія ўмацоўвалі з ім валадарства ягонае, з усім Ізраілем, каб паставіць яго на валадара, паводле слова ГОСПАДА адносна Ізраіля. ¹¹І вось лік волатаў, якія [былі] з Давідам: Яшавэам, сын Хахмоні, галоўны з трыццаці. Ён падняў дзіду сваю на тры сотні [ворагаў] і пабіў іх адным разам. ¹²Пасьля яго Элеазар, сын Дадо Ахахіча. Ён — [адзін] з трох магутных.

¹³Ён быў з Давідам у Пас-Даміме, і Філістынцы сабраліся там на вайну. І была частка поля засеяна ячменем, і народ уцёк перад абліччам Філістынцаў. ¹⁴І яны сталі пасярод поля, і абаранілі яго, і пабілі Філістынцаў. І збавіў ГОСПАД збаўленьнем вялікім. ¹⁵І зыйшлі трое з гэтых трыццаці галоўных на скалу да Давіда, у пячору Адулям, а табар Філістынцаў быў у даліне Рэфаім.

¹⁶Давід тады быў у крэпасьці, а аддзел Філістынцаў быў у Бэтлееме. ¹⁷І засмагнуў Давід, і сказаў: «Хто дасьць мне піць вады са студні ў Бэтлееме, якая каля брамы?» ¹⁸І тады гэтыя тры прабіліся скрозь табар Філістынцаў, і зачэрпнулі са студні ў Бэтлееме, якая каля брамы, і прынесьлі, і далі Давіду. І не захацеў Давід піць яе, і выліў яе для ГОСПАДА.

¹⁹І сказаў: «Няхай будзе далёка ад мяне, Божа мой, каб я зрабіў гэта! Ці буду я піць кроў мужоў гэтых, якія мелі ў небясьпецы душы свае? Бо з небясьпекай для душаў сваіх яны прынесьлі [ваду]». І не захацеў яе піць. Вось што зрабілі гэтыя тры волаты. ²⁰І Абішай, брат Ёава, быў галоўны над трыма. Ён падняў дзіду сваю на тры сотні [ворагаў] і пабіў [іх], і меў імя ў тых трох. ²¹З трыццаці ён быў выдатнейшы, і быў іх правадыром; але першым тром не дараўняўся.

²²Бэная, сын Егаяды, сын мужа адважнага, [слаўнага] шматлікімі справамі, з Каўцээлю. Ён перамог двух ільвоў Мааву; і ён зыйшоў, і забіў ільва ў яме ў дзень завеі. ²³І ён забіў Эгіпцяніна, чалавека, [які быў] ростам у пяць локцяў. У руцэ Эгіпцяніна была дзіда, як навой ткацкі; і ён выйшаў на яго з кіем, і вырваў дзіду з рукі Эгіпцяніна, і забіў яго дзідай ягонай. ²⁴Вось што зрабіў Бэная, сын Егаяды! І ён меў імя ў тых трох волатаў.

²⁵Ён быў слаўны сярод трыццаці, але тром не дараўняўся. І Давід паставіў яго над вартаю сваёй. ²⁶І магутныя з мужных: Асаэль, брат Ёава, Эльханан, сын Дадо з Бэтлеему; ²⁷Шамот з Гароры; Хэлец з Пэлоны; ²⁸Іра, сын Ікеша, з Тэкоа; Абіэзэр з Анатоту; ²⁹Сібэнай з Хушаты, Ілай з Ахохі, ³⁰Маграй з Нэтофы; Хэлед, сын Бааны, з Нэтофы; ³¹Ітай, сын Рыбая, з Гівы сыноў Бэн’яміна; Бэная з Піратону; ³²Хурай з Нахале-Гааша; Абіэль з Арабаты;

³³Азмавэт з Бахурыму, Эліахба з Шаалвону; ³⁴сыны Гашэма з Гізону; Ёнатан, сын Шагэ, з Гарары; ³⁵Ахіям, сын Сахара, з Гарары; Эліфал, сын Ура; ³⁶Хэфэр з Мэхэры; Ахія з Пэлоны; ³⁷Хэцро з Кармэлю; Наарай, сын Эзбая; ³⁸Ёэль, брат Натана; Міўхар, сын Гагры; ³⁹Цэлек з Амону; Нахарай з Бэроту, збраяносец Ёава, сына Цэруі; ⁴⁰Іра з Етэру; Гарэў з Етэру;

⁴¹Урыя Хет; Завад, сын Ахлая; ⁴²Адына, сын Шызы, Рубэніч, галава сыноў Рубэна, і з ім трыццаць; ⁴³Ханан, сын Маахі; Язафат з Мітні; ⁴⁴Узі з Аштароту; Шама і Еіэль, сыны Хафама з Араэру; ⁴⁵Едыяэль, сын Шымры, і Ёха, брат ягоны, з Тыцы; ⁴⁶Эліэль з Махавіму, Ерывай і Ёшавай, сыны Эльнаама; Ітма з Мааву; ⁴⁷Эліеэль, Абэд, Яасіэль з Мэцаваі.