Psalms 136

His mercy endures forever

Bay remèsiman a SENYÈ a, paske Li Bon, paske lanmou dous Li a dire jis pou tout tan. ²Bay remèsiman a Bondye anwo tout dye yo, paske lanmou dous Li a dire jis pou tout tan. ³Bay remèsiman a Senyè de tout senyè yo, paske lanmou dous li a dire jis pou tout tan; ⁴A Sila sèl ki fè gwo mèvèy yo, paske lanmou dous Li a dire jis pou tout tan; ⁵A Sila ki ak gran kapasite te fè syèl la, paske lanmou dous Li a dire jis pou tout tan; ⁶a Sila ki te ranje tè a anwo dlo yo, paske lanmou dous Li a dire jis pou tout tan; ⁷a Sila ki te fè gran limyè yo, paske lanmou dous Li a dire jis pou tout tan; ⁸solèy ki pou domine lajounen an, paske lanmou dous Li a dire jis pou tout tan;

⁹Lalin ak zetwal pou domine lannwit, paske lanmou dous Li a dire jis pou tout tan; ¹⁰A Sila ki te frape Ejipsyen yo nan premye ne yo, paske lanmou dous Li a dire jis pou tout tan; ¹¹ki te mennen Israël fè l sòti nan mitan yo, paske lanmou dous Li a dire jis pou tout tan; ¹²Avèk yon men fò ak yon bra lonje nèt, paske lanmou dous Li a dire jis pou tout tan; ¹³a Sila ki te divize Lanmè Wouj fè de bò a, paske lanmou dous Li a dire jis pou tout tan; ¹⁴ki te fè Israël pase nan mitan li, paske lanmou dous Li a dire jis pou tout tan; ¹⁵men Li te boulvèse Farawon ak lame li a nan Lanmè Wouj la, paske lanmou dous Li a dire jis pou tout tan; ¹⁶a Sila ki te mennen pèp Li a nan dezè a, paske lanmou dous Li a dire jis pou tout tan;

¹⁷a Sila ki te frape gran wa yo, paske lanmou dous Li a dire jis pou tout tan; ¹⁸ki te touye wa pwisan yo, paske lanmou dous Li a dire jis pou tout tan; ¹⁹Sihon, wa Amoreyen an, paske lanmou dous Li a dire jis pou tout tan; ²⁰ak Og, wa Basan an, paske lanmou dous Li a dire jis pou tout tan; ²¹e te bay peyi yo kon eritaj, paske lanmou dous Li a dire jis pou tout tan; ²²menm yon eritaj a Israël, sèvitè Li a, paske lanmou dous Li a dire jis pou tout tan; ²³ki te sonje nou nan eta imilyasyon nou yo, paske lanmou dous Li a dire jis pou tout tan; ²⁴epi ki te delivre nou nan men advèsè nou yo, paske lanmou dous Li a dire jis pou tout tan;

²⁵ki bay manje a tout chè, paske lanmou dous Li a dire jis pou tout tan. ²⁶Bay remèsiman a Bondye syèl la, paske lanmou dous Li a dire jis pou tout tan.