Proverbs 14

The wise woman builds her house

Fanm saj la bati kay li, men fanm ensanse a demoli li ak pwòp men li. ²Sila ki mache nan ladwati a gen lakrent SENYÈ a; men sila ki fè chemen kwochi a meprize li. ³Nan bouch a moun sòt la, se yon baton pou do li; men lèv a saj yo va pwoteje yo.

⁴Kote nanpwen bèf, manjwa a pwòp; men se fòs a bèf la ki fè richès. ⁵Yon temwen fidèl p ap bay manti; men yon fo temwen pale manti. ⁶Yon mokè chache sajès, e li pa jwenn anyen; men konesans fasil pou sila ki gen bon konprann nan.

⁷Kite prezans a yon moun ensanse, sinon ou p ap rekonèt pawòl a saj yo. ⁸Sajès a moun rezonab la se pou l konprann chemen li; men betiz a moun ensanse a se desepsyon. ⁹Moun ensanse kontwole peche kon jwèt; men pami moun dwat yo, gen bòn volonte.

¹⁰Kè a konnen pwòp amètim ak bonè li; men ak lòt, sa p ap pataje. ¹¹Lakay mechan yo va detwi; men tant a moun dwat la va fleri. ¹²Gen yon chemen ki sanble bon pou lòm; men fen li se chemen lanmò an.

¹³Menm lè bouch ri, kè a ka gen doulè, e lajwa kon fini nan tristès. ¹⁴Kè a ki pa fidèl va jwen rekonpans pou pwòp chemen li; men yon bon moun va rekonpanse pou sa li fè a. ¹⁵Moun san konprann kwè nan tout bagay; men yon nonm k ap reflechi veye pa li yo.

¹⁶Yon nonm saj fè atansyon pou l vire kite mal; men yon moun fou plen ògèy; li pa pè anyen. ¹⁷Yon nonm kolerik aji nan foli, e yon nonm koken va rayi pa lòt yo. ¹⁸Moun san konprann yo gen foli kon eritaj; men moun rezonab lan kouwone ak konesans.

¹⁹Mal la va bese devan sa ki bon an; e mechan an devan pòtay a moun dwat la. ²⁰Malere a vin rayi menm pa vwazen li; men moun gwo kòb gen anpil zanmi. ²¹Sila ki meprize vwazen li fè peche; men sila ki fè gras a malere a, beni.

²²Èske sila ki fòmante mechanste a, pa egare? Men ladousè avèk verite se pou sa yo ki fè sa ki bon. ²³Nan tout travay gen pwofi; men pale anpil mennen nan povrete. ²⁴Kouwòn saj yo se richès yo; men betiz moun ensanse se foli yo.

²⁵Yon vre temwen sove lavi a moun; men sila ki pale manti pase moun nan betiz. ²⁶Nan lakrent SENYÈ a, gen gwo konfyans; e pitit li yo va jwenn sekou. ²⁷Lakrent SENYÈ a se yon fontèn dlo lavi, pou moun ka evite pèlen lanmò yo.

²⁸Nan fòs kantite a pèp yo se glwa a yon wa, men afè prens ki manke moun gate nèt. ²⁹Sila ki lan nan kòlè a, gen gwo konprann; men sila ki fè fache vit, leve foli byen wo. ³⁰Yon kè trankil se lavi pou kò a; men pasyon fè tout zo yo pouri.

³¹Sila ki oprime malere a ap vekse Kreyatè li; men sila ki gen bonte anvè pòv la, onore L. ³²Mechan an jete anba pa malfezans li; men moun ladwati a gen sekou lè l mouri. ³³Sajès se nan kè a sila ki gen bon konprann nan; menm moun ensanse yo, nan kè, yo konnen.

³⁴Ladwati leve yon nasyon; men peche se yon gwo wont pou yon pèp. ³⁵Favè a wa a se anvè sèvitè ki aji ak sajès; men kòlè li se anvè sila ki fè gwo wont.