Psalms 49

No one can redeem another

Кіраўніку хору. Сыноў Караха. Псальм. ²Чуйце гэта, усе народы! Прыхіліце вуха, усе жыхары веку гэтага! ³Як сыны паспалітыя, так і сыны знакамітыя, разам багатыя і бедныя.

⁴Вусны мае кажуць мудрасьць, і думкі сэрца майго разважлівыя. ⁵Прыхілю да прыповесьці вуха маё, выяўлю пры [гуках] гусьляў загадку маю. ⁶Навошта мне баяцца ў дні няшчасьця, калі атачыла мяне беззаконьне тых, якія нападаюць на мяне, ⁷якія спадзяюцца на сілу сваю і мноствам багацьця свайго хваляцца?

⁸Ніхто выбавіць брата ня можа і даць за яго выкуп Богу, ⁹бо вельмі дарагая цана за душу ягоную, і зрачыся гэтага [мусіць] на вякі, ¹⁰каб ён жыў заўсёды і ня ўбачыў парахненьня.

¹¹Бо [кожны] бачыць: мудрыя паміраюць, дурны і шалёны разам прападаюць, і пакідаюць іншым багацьце сваё. ¹²Думкі іхнія пра тое, што дамы іхнія на вякі, сялібы іхнія — з пакаленьня ў пакаленьне, і яны сваім імем назвалі [цэлыя] землі. ¹³Але чалавек у славе [доўга] трываць ня будзе, ён падобны да скаціны, якая гіне.

¹⁴Гэткі шлях іхні, тых, якія спадзяюцца на сябе, і тых, якім [словы] вуснаў іхніх да­спа­добы. (Сэлях) ¹⁵Як авечкі, у пекла яны зыйдуць, сьмерць пасьвіць іх будзе, і раніцаю правыя будуць мець уладу над імі, сіла іхняя ссохне, пекла — жытло іхняе. ¹⁶Але Бог выбавіць душу маю з рукі пекла, бо Сам возьме мяне. (Сэлях) ¹⁷Ня бойся, калі хто багацее, калі множыцца слава дому ягонага, ¹⁸бо, калі памрэ, нічога ня возьме з сабою, і слава ягоная ня пойдзе за ім.

¹⁹Хоць бы за жыцьця свайго душу сваю ён дабраслаўляў, і хвалілі яго, калі добра рабіў для сябе, ²⁰ён пойдзе за пакаленьнем бацькоў сваіх, што ня ўбачаць ніколі сьвятла. ²¹Чалавек у славе і без разуменьня падобны да скаціны, якая гіне.