Colossians 3

Set your minds on things above

Дык калі вы ўваскрэсьлі з Хрыстом, шукайце ўзгор­нага, дзе Хрыстос ся­дзіць праваруч Бога. ²Пра ўзгорнае думайце, а не пра зямное, ³бо вы памерлі, і жыцьцё вашае схаванае з Хрыстом у Богу.

⁴Калі зьявіцца Хрыстос, жыцьцё нашае, тады і вы зьявіцеся разам з Ім у славе. ⁵Дык мярцьвіце члены вашыя, што на зямлі: распусту, нячыстасьць, жарсьць, благое пажаданьне і хцівасьць, якая ёсьць ідалапаклонствам, ⁶за што гнеў Божы прыходзіць на сыноў непакорнасьці, ⁷сярод якіх і вы раней хадзілі, калі жылі між імі.

⁸А цяпер вы адкіньце ўсё: гнеў, ярасьць, ліхоту, блюзьнерствы, брыдкаслоўе з вуснаў вашых; ⁹не хлусіце адзін аднаму, распрануўшыся са старога чалавека з учынкамі ягонымі ¹⁰і апрануўшыся ў новага, які абнаўляецца ў пазнаньні паводле вобразу Таго, Хто яго стварыў, ¹¹дзе няма Грэка і Юдэя, абразаньня і неабразаньня, барбара, Скіфа, слугі, свабоднага, але ўсё і ў-ва ўсім Хрыстос.

¹²Дык апраніцеся, як выбраныя Божыя, сьвятыя і ўлюбёныя, у міласэрнасьць, ласкавасьць, пакору, ціхасьць, доўгацярплівасьць, ¹³церпячы адзін аднаго і прабачаючы адзін аднаму, калі хто на каго мае крыўду, як Хрыстос дараваў вам, гэтак і вы. ¹⁴А па-над усё [апраніцеся] ў любоў, якая ёсьць вузел дасканаласьці, ¹⁵і няхай гаспадарыць у сэрцах вашых супакой Божы, да якога вы і пакліканыя ў адным целе, і будзьце ўдзячныя.

¹⁶Слова Хрыстовае няхай жыве ў вас багата, у-ва ўсякай мудрасьці; навучайце і настаўляйце адзін аднаго псальмамі, і гімнамі, і сьпевамі духоўнымі, у ласцы сьпяваючы Госпаду ў сэрцах вашых. ¹⁷І ўсё, што вы робіце, словам або справаю, усё [рабіце] ў імя Госпада Ісуса, дзякуючы праз Яго Богу і Айцу.

Christian households

¹⁸Жонкі, падпарадкоўвайцеся мужам вашым, як прыстойна ў Госпадзе. ¹⁹Мужы, любіце жонак і ня будзьце для іх прыкрымі. ²⁰Дзеці, слухайцеся бацькоў у-ва ўсім, бо гэта падабаецца Госпаду.

²¹Бацькі, не зьнеахвочвайце дзяцей вашых, каб яны не гублялі духа.

Work as for the Lord

²²Слугі, у-ва ўсім слухайцеся паноў паводле цела, не на вачах толькі паслугуючы, як тыя, што людзям дагаджаюць, але ў шчырасьці сэрца, баючыся Бога. ²³І ўсё, што робіце, рабіце ад душы, як для Госпада, а не для людзей, ²⁴ведаючы, што ад Госпада атрымаеце ў нагароду спадчыну, бо вы служыце Госпаду Хрысту.

²⁵А хто робіць крыўду, атрымае паводле зробленае крыўды, бо няма [ў Бога] ўзіраньня на аблічча.