Psalms 24

The earth is the Lord's

לדוד מזמור ליהוה הארץ ומלואה תבל וישבי בה: ²כי הוא על ימים יסדה ועל נהרות יכוננה: ³מי יעלה בהר יהוה ומי יקום במקום קדשו: ⁴נקי כפים ובר לבב אשר לא נשא לשוא נפשי ולא נשבע למרמה: ⁵ישא ברכה מאת יהוה וצדקה מאלהי ישעו: ⁶זה דור דרשו מבקשי פניך יעקב סלה: ⁷שאו שערים ראשיכם והנשאו פתחי עולם ויבוא מלך הכבוד: ⁸מי זה מלך הכבוד יהוה עזוז וגבור יהוה גבור מלחמה:

⁹שאו שערים ראשיכם ושאו פתחי עולם ויבא מלך הכבוד: ¹⁰מי הוא זה מלך הכבוד יהוה צבאות הוא מלך הכבוד סלה: