Isaiah 43
I have called you by name
ועתה כה אמר יהוה בראך יעקב ויצרך ישראל אל תירא כי גאלתיך קראתי בשמך לי אתה: 2כי תעבר במים אתך אני ובנהרות לא ישטפוך כי תלך במו אש לא תכוה ולהבה לא תבער בך: 3כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך: 4מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך: 5אל תירא כי אתך אני ממזרח אביא זרעך וממערב אקבצך: 6אמר לצפון תני ולתימן אל תכלאי הביאי בני מרחוק ובנותי מקצה הארץ: 7כל הנקרא בשמי ולכבודי בראתיו יצרתיו אף עשיתיו: 8הוציא עם עור ועינים יש וחרשים ואזנים למו:
9כל הגוים נקבצו יחדו ויאספו לאמים מי בהם יגיד זאת וראשנות ישמיענו יתנו עדיהם ויצדקו וישמעו ויאמרו אמת: 10אתם עדי נאם יהוה ועבדי אשר בחרתי למען תדעו ותאמינו לי ותבינו כי אני הוא לפני לא נוצר אל ואחרי לא יהיה: 11אנכי אנכי יהוה ואין מבלעדי מושיע: 12אנכי הגדתי והושעתי והשמעתי ואין בכם זר ואתם עדי נאם יהוה ואני אל: 13גם מיום אני הוא ואין מידי מציל אפעל ומי ישיבנה:
A way in the wilderness
14כה אמר יהוה גאלכם קדוש ישראל למענכם שלחתי בבלה והורדתי בריחים כלם וכשדים באניות רנתם: 15אני יהוה קדושכם בורא ישראל מלככם: 16כה אמר יהוה הנותן בים דרך ובמים עזים נתיבה: 17המוציא רכב וסוס חיל ועזוז יחדו ישכבו בל יקומו דעכו כפשתה כבו: 18אל תזכרו ראשנות וקדמניות אל תתבננו: 19הנני עשה חדשה עתה תצמח הלוא תדעוה אף אשים במדבר דרך בישמון נהרות: 20תכבדני חית השדה תנים ובנות יענה כי נתתי במדבר מים נהרות בישימן להשקות עמי בחירי: 21עם זו יצרתי לי תהלתי יספרו:
I blot out your transgressions
22ולא אתי קראת יעקב כי יגעת בי ישראל: 23לא הביאת לי שה עלתיך וזבחיך לא כבדתני לא העבדתיך במנחה ולא הוגעתיך בלבונה: 24לא קנית לי בכסף קנה וחלב זבחיך לא הרויתני אך העבדתני בחטאותיך הוגעתני בעונתיך: 25אנכי אנכי הוא מחה פשעיך למעני וחטאתיך לא אזכר: 26הזכירני נשפטה יחד ספר אתה למען תצדק: 27אביך הראשון חטא ומליציך פשעו בי: 28ואחלל שרי קדש ואתנה לחרם יעקב וישראל לגדופים: