Psalms 94

How long will the wicked triumph

א  אל-נקמות יהוה    אל נקמות הופיע ²ב  הנשא שפט הארץ    השב גמול על-גאים ³ג  עד-מתי רשעים יהוה    עד-מתי רשעים יעלזו ⁴ד  יביעו ידברו עתק    יתאמרו כל-פעלי און ⁵ה  עמך יהוה ידכאו    ונחלתך יענו ⁶ו  אלמנה וגר יהרגו    ויתומים ירצחו ⁷ז  ויאמרו לא יראה-יה    ולא-יבין אלהי יעקב ⁸ח  בינו בערים בעם    וכסילים מתי תשכילו

⁹ט  הנטע אזן הלא ישמע    אם-יצר עין הלא יביט ¹⁰י  היסר גוים הלא יוכיח    המלמד אדם דעת ¹¹יא  יהוה--ידע מחשבות אדם    כי-המה הבל ¹²יב  אשרי הגבר אשר-תיסרנו יה    ומתורתך תלמדנו ¹³יג  להשקיט לו מימי רע--    עד יכרה לרשע שחת ¹⁴יד  כי לא-יטש יהוה עמו    ונחלתו לא יעזב ¹⁵טו  כי-עד-צדק ישוב משפט    ואחריו כל-ישרי-לב ¹⁶טז  מי-יקום לי עם-מרעים    מי-יתיצב לי עם-פעלי און

¹⁷יז  לולי יהוה עזרתה לי--    כמעט שכנה דומה נפשי ¹⁸יח  אם-אמרתי מטה רגלי    חסדך יהוה יסעדני ¹⁹יט  ברב שרעפי בקרבי--    תנחומיך ישעשעו נפשי ²⁰כ  היחברך כסא הוות    יצר עמל עלי-חק ²¹כא  יגודו על-נפש צדיק    ודם נקי ירשיעו ²²כב  ויהי יהוה לי למשגב    ואלהי לצור מחסי ²³כג  וישב עליהם את אונם--    וברעתם יצמיתם יצמיתם    יהוה אלהינו