잠언 4

무엇보다 지혜를 얻으라

Whakarongo, e āku tamariki, ki te whakaako a te matua, tahuri mai hoki kia mātauria ai ngā whakaaro mōhio. ²He pai hoki te kupu mōhio ka hoatu nei e ahau ki a koutou, kaua tāku ture e whakarērea. ³He tama anō hoki ahau ki tōku pāpā, ā, he ngāwari, he mea kotahi e matenuitia ana e tōku whaea, ⁴i whakaako anō ia i ahau, i mea ki ahau, “Puritia āku kupu e tōu ngākau; kia mau ki āku whakahau, ā, e ora koe.

⁵Whāia mōu te whakaaro nui, whāia mōu te mātauranga; kaua e wareware ki tērā, kaua hoki e neke atu i ngā kupu a tōku māngai. ⁶Kaua ia e whakarērea, ā, māna koe e tiaki; arohaina ia, ā, māna koe e mau ai. ⁷Ko te whakaaro nui te tino mea: Nō reira whāia mōu te whakaaro nui, ā, i ōu whiwhinga katoa, kia whiwhi koe ki te mātauranga.

⁸Whakanuia ia, ā, māna koe ka kake ai; ka whakahōnore ia i a koe ki te awhitia e koe. ⁹Ka hōmai e ia he pare ātaahua ki tōu māhunga, ka pōtaea anō koe e ia ki te karauna whakapaipai.” ¹⁰Whakarongo, e tāku tama, maharatia āku kupu, ā, he maha ngā tau e ora ai koe.

¹¹He mea whakaako koe nāku ki te ara o te whakaaro nui; he mea ārahi koe nāku i ngā ara o te tika. ¹²Ka haere koe, e kore ōu takahanga e whakakikītia mai; ki te rere koe, e kore koe e tūtuki. ¹³Kia mau ki te ako, kaua e tukua atu; matapoporetia iho, ko tōu oranga hoki ia.

¹⁴Kaua e haere i te ara o te hunga kino, kaua hoki e takahia te huarahi o te hunga hē. ¹⁵Anga kē ake; kaua e tika nā reira; peka ake i taua ara, haere tonu atu. ¹⁶E kore hoki rātou e moe ki te kore e oti tētahi mahi hē mā rātou; riro rawa tō rātou moe, ki te kāhore tētahi tangata e hinga i a rātou.

¹⁷Nō te kino hoki te taro e kainga ana e rātou, nō te nanakia te wāina e inumia ana e rātou. ¹⁸Ko te huarahi ia o te hunga tika, koia anō kei te mārama e whiti ana, ā, ka neke haere tonu ake tōna mārama, ā taea noatia te tino rā. ¹⁹Ko te ara o te hunga kino, me he pōuri, e kore rātou e mōhio ki te mea i tūtuki ai rātou.

²⁰E tāku tama, tahuri ki āku kupu; anga mai tōu taringa ki āku kōrero. ²¹Kei kotiti kē ēnei i ōu kanohi; puritia i waenganui o tōu ngākau. ²²He oranga ēnei mō te hunga e kitea ai, he rongoā mō ō rātou kikokiko katoa.

²³Kia pau ōu mahara ki te tiaki i tōu ngākau, nō reira hoki ngā putanga o te ora. ²⁴Whakarērea te māngai whanokē, kia matara rawa i a koe ngā ngutu tutū. ²⁵Kia hāngai tonu te titiro whakamua a ōu kanohi, kia titiro ōu kamo ki mua tonu i a koe.

²⁶Whakatikaia te huarahi o ōu waewae, kia ū anō hoki ōu ara katoa. ²⁷Kaua e peka ki matau, ki mauī; kia anga kē tōu waewae i te kino.