잠언 2

지혜를 감추어진 보배같이 찾으라

E tāku tama, ki te tango koe i āku kupu, ki te huna i āku whakahau ki roto ki a koe, ²ā, ka tahuri tōu taringa ki te whakaaro nui, ka anga anō tōu ngākau ki te mātauranga; ³āe rā, ki te mea ka kārangarangatia e koe te mātauranga, ā, ka puaki tōu reo ki te ngākau mōhio; ⁴ki te rapua hoki ia e koe ānō he hiriwa, ki te kimihia ānō he taonga huna – ⁵ko reira koe mātau ai ki te wehi o Ihowā, kite ai i te mōhio ki te Atua.

⁶Mā Ihowā hoki e hōmai te whakaaro nui; nō tōna māngai te mātauranga me te ngākau mōhio. ⁷E rongoātia ana e ia te whakaaro nui mā te hunga tika; he whakangungu rākau ia mō te hunga he tapatahi nei te haere, ⁸kia tiakina ai e ia ngā ara o te whakawā, kia tohungia ai te ara o tāna hunga tapu.

⁹Ko reira koe mōhio ai ki te tika, ki te whakawā, ki te mea anō e rite ana, āe rā, ki ngā ara pai katoa. ¹⁰Ka uru hoki te whakaaro nui ki roto ki tōu ngākau, ā, ka reka te mātauranga ki tōu wairua; ¹¹ka ai te ngārahu pai hei tiaki i a koe, te ngākau mōhio hei pupuri i a koe; ¹²hei kukume mai i a koe i te ara o te kino, i te tangata e puta kē ana āna kōrero; ¹³i te hunga e whakarere nei i ngā ara o te tika, e haere ana i ngā ara o te pōuri; ¹⁴e koa ana, i a rātou e mahi ana i te kino, e hari ana ki ngā tikanga parori kē o te kino; ¹⁵he ara kōpikopiko ō rātou, he whanokē rātou i ō rātou huarahi; ¹⁶hei whakaora i a koe i te wahine tauhou, i te wahine tauhou e whakapati nei ki āna kupu.

¹⁷Kua whakarērea nei e ia te hoa o tōna tamāhinetanga, kua wareware ki te kawenata o tōna Atua. ¹⁸E heke atu ana hoki tōna whare ki te mate, ōna ara ki ngā tūpāpaku. ¹⁹Ko te hunga katoa e haere atu ana ki a ia e kore e hoki mai; e kore anō e mau i a rātou ngā ara o te ora.

²⁰Ā, ka haere koe i ngā ara o ngā tāngata pai, ka mau anō ki ngā ara o te hunga tika. ²¹Ka noho hoki te hunga tika ki te whenua; ka mau te hunga ngākau tapatahi ki reira. ²²Ka hātepea atu ia te hunga kino i runga i te whenua, ka hūtia atu i reira te hunga he kōpeka tā rātou mahi.