욥기 6
내 슬픔이 바다 모래보다 무겁구나
Nā, ka whakautu a Hopa, ka mea: 2“Auē, me i āta pāunatia tōku mamae, me i huihuia, me i whakairihia tōku aituā ki te pāuna! 3Nā, ināianei taimaha ake i te onepū o te moana: heoi he ohorere rawa āku kupu.
4Kei roto hoki i ahau ngā pere a te Kaha Rawa, inumia ake e tōku wairua tō rātou paihana; rārangi tonu mai ngā whakawehi a te Atua hei hoariri mōku. 5E tangi anō rānei te kāihe mohoao te mea kei te tarutaru ia? E tangi anō rānei te kau i te mea e kai ana? 6E taea rānei te kai, te mea kāhore nei ōna hā, ki te kāhore he tote? He reka rānei te whakakahukahu o te hua manu?
7Hore rawa tōku wairua e mea kia pā atu ki ēnā; tō rātou rite ki ahau kei te kai whakarihariha. 8“Auē, me i riro mai tāku i tono ai, me i hōmai e te Atua tāku e tūmanako nei! 9Me i pai hoki te Atua kia whakangaromia ahau, kia tukua mai tōna ringa hei hātepe i ahau!
10Pēnei kua ai anō he whakamārie mōku. Āe, ka tino hari ahau ki te mamae, kāhore nei e tohu i ahau; kīhai hoki ngā kupu a te Mea Tapu i hunā e ahau. 11“He aha tōku kaha, e tatari ai ahau? He aha hoki tōku mutunga, e whakamanawanui ai ahau? 12He kaha kōhatu rānei tōku kaha? He parāhi rānei ōku kikokiko?
13Ehara rānei i te mea kāhore he āwhina mōku i roto i ahau, ā, kua oti te ngoi te pei i roto i ahau? 14“Ko te tangata e ngoikore ana te ngākau kia puta mai te aroha o tōna hoa ki a ia, ahakoa kua mahue i a ia te wehi i te Kaha Rawa. 15He mahi tinihanga a ōku tēina, he pērā me tā te awa; rere ana rātou ānō he waipuke awaawa, 16kua mangu nei i te hukapapa, ngaro ana te hukarere i roto.
17I te wā e mahana ai, ka memeha atu; i te weraweratanga, mōtī iho rātou i tō rātou wāhi. 18Ka peka kē ngā tira e haere ana rā reira; riro ana ki te kore, ā, ngaro iho. 19Tirotirohia ana e ngā tira o Tema; tāria atu ana e ngā tāngata haere o Hēpā.
20Whakamā ana rātou mō rātou i whakamanawa atu ki reira; te taenga ki aua awa, kanakana kau ana. 21Nā, he kāhore noa iho koutou; ka kite koutou i te mea whakamataku, ā, ka wehi. 22I mea rānei ahau, ‘Hōmai ki ahau? He hākari rānei māku e hōmai i ō koutou rawa’?
23I mea rānei, ‘Whakaorangia ahau i te ringa o te hoariri’? ‘Hokona ahau i roto i te ringa o te kaitūkino’? 24“Whakaakona ahau, ā, ka whakarongo puku ahau; whakaaturia ki ahau te mea i hē ai ahau. 25Anō te kaha o ngā kupu tika! Ko te aha ia te rīria ana e ā koutou kupu?
26E mea ana rānei koutou kia rīria ngā kupu? He hau kau nei hoki ngā kōrero a te tangata kua pau ōna whakaaro. 27Āe rā, e mea ana koutou ki te maka rota mō ngā pani, ki te mea i tō koutou hoa hei taonga hokohoko. 28“Nā, whakaae mai, titiro mai ki ahau; he pono hoki e kore ahau e kōrero teka ki tō koutou kanohi.
29Tēnā rā, tahuri mai; kaua hoki te hē e waiho; inā, tahuri mai, he tika hoki tāku take. 30He hē koia kei tōku arero? E kore rānei tōku hinengaro e mōhio ki ngā mea whanokē?”