욥기 10

욥이 마음의 괴로움으로 말하다

“Kua hōhā tōku wairua ki tōku ora; ka tukua e ahau tāku tangi kia rere ana; ka kōrero ahau i te kikiwatanga o tōku ngākau. ²Ka mea ahau ki te Atua, Kaua ahau e whakahēngia; whakakitea ki ahau te take i totohe ai koe ki ahau. ³He mea pai rānei ki a koe kia tūkino koe, kia whakahāwea ki te mahi a ōu ringa, ā, kia whiti tōu mārama ki te whakaaro o te hunga kino?

⁴He kanohi kikokiko rānei ōu? He pēnei rānei tāu titiro me tā te tangata titiro? ⁵He rite rānei ōu rā ki ō te tangata rā? He rite rānei ōu tāu ki ō te tangata rā? ⁶I uiuia ai e koe tōku kino, i rapua ai e koe tōku hara?

⁷Ahakoa e mōhio ana anō koe ehara ahau i te mea hē, kāhore anō tētahi hei whakaora i roto i tōu ringa? ⁸“Nā ōu ringa ahau i mahi, i hanga, he mea hono mārie i tētahi taha, i tētahi taha; otiia, e whakangaromia ana ahau e koe. ⁹Kia mahara rā, nāu ahau i hanga, ānō he paru; tērā rānei koe e whakahoki anō i ahau ki te puehu?

¹⁰He teka ianei he mea riringi ahau nāu ānō he waiū, meinga ana ahau e koe kia tetepe ānō he tīhi? ¹¹Nāu ahau i whakakākahu ki te kiri, ki te kikokiko, ā, nāu anō ahau i hohou ki te wheua, ki te uaua. ¹²Whakawhiwhia ana ahau e koe ki te ora, ki te atawhai, ā, he tirotirohanga mai nāu i mau ai tōku wairua.

¹³“Heoi, hunā ana anō ēnei mea e koe i roto i tōu ngākau; e mōhio ana hoki ahau kei a koe anō tēnei. ¹⁴Ki te hara ahau, ka mātauria e koe; e kore anō koe e whakakāhore ki tōku hē. ¹⁵Ki te hē ahau, auē tōku mate! Ki te tika ahau, e kore tonu e ara tōku māhunga; he kī hoki nōku i te whakamā me te titiro iho ki tōku mate.

¹⁶Ā, ki te whakarewa ake tōku māhunga i a ia, ka whāia ahau e koe ānō he raiona; ā, ka whakakite anō koe i a koe, i tōu mīharo, ki ahau. ¹⁷E whakahoutia ana e koe āu kaiwhakaatu i ōku hē, e whakanuia ana hoki e koe tōu riri ki ahau; ko ngā putanga kētanga, ko te whawhai hei pēhi i ahau. ¹⁸“He aha rā ahau i whakaputaina mai ai e koe i roto i te kōpū? Te hemo noa atu ai ahau, ā, kīhai tētahi kanohi i kite i ahau.

¹⁹Pēnei kua rite ahau, ānō kua kāhore noa iho; kua mauria atu ahau i te kōpū ki te urupā. ²⁰He teka rānei he torutoru ōku rā? Kāti rā, waiho ake koa ahau, kia āhua mākoha ana i tēnei wā iti, ²¹keiwhā haere ahau ki te wāhi e kore nei ahau e hoki mai, ki te whenua o te pōuri, o te ātārangi o te mate; ²²ki te whenua o te pōuri kerekere, o te tino o te pōuri; he whenua nō te ātārangi o te mate, kāhore nei ō reira tikanga, ā, ko tōna mārama, koia anō te pōuri.”