욥기 4

엘리바스가 환상을 말하다

Eliifaaz namichi Teemaan sun akkana jedhee deebise: ²“Yoo namni tokko sitti dubbachuu yaale, ati ni komattaa? Garuu eenyutu dubbachuu dhiisa? ³Ati akka nama baayʼee barsiifte, akka harka dadhabaa illee jajjabeessite yaadadhu.

⁴Dubbiin kee warra gatantaran gargaaree dhaabeera; atis jilba laafe jabeessiteerta. ⁵Amma garuu rakkinni sirra gaʼe; atis abdii kutatteerta; rakkinni si miidheera; atis rifatteerta; ⁶Waaqa sodaachuun kee irkoo kee, qajeelinni karaa keetiis abdii kee mitii?

⁷“Ammas yaadadhu; namni qulqulluun takkumaa badee beekaa? Qajeelonni eessatti badanii beeku? ⁸Akka ani hubadhetti warri waan hamaa qotatan, kanneen waan hamaa facaasanis isuma haammatu. ⁹Isaanis hafuura Waaqni isaanitti baafatuun badu; hafuuraa dheekkamsa isaaniitiinis ni barbadeeffamu.

¹⁰Leenci ni aada; ni gururiʼas; ilkaan leenca saafelaa garuu ni caccaba. ¹¹Leenci jabaan waan adamsu dhabee ni duʼa; ilmaan leenca dhaltuus ni bittinnaaʼu. ¹²“Dubbiin tokko icciitiidhaan naa fidame; gurri koos asaasa isaa dhagaʼe.

¹³Abjuu halkanii sodaachisaa keessa, yommuu hirribni cimaan nama qabatutti, ¹⁴sodaa fi hollachuun na qabatee lafee koo hunda raase. ¹⁵Hafuurri luffi jedhee fuula koo dura darbe; rifeensi dhagna koos kaʼee dhaabate.

¹⁶Innis ni dhaabate; ani garuu inni maal akka taʼe hubachuu hin dandeenye. Fakkiin tokko ija koo dura dhaabate; anis sagalee tasgabbii kan akkana jedhu tokkon dhagaʼe: ¹⁷‘Namni duʼa hin oolle, Waaqa caalaa qajeelaa taʼuu dandaʼaa? Namni Uumaa isaa caalaa qulqulluu taʼuu dandaʼaa? ¹⁸Waaqni tajaajiltoota isaa hin amanatu; ergamoota isaas balleessaa isaaniitiin ni gaafata; ¹⁹yoos warri manneen suphee keessa jiraatan, warri hundeen isaanii biyyoo taʼe, warri bilii caalaa burkutaaʼan immoo akkam haa taʼan ree?

²⁰Isaan ganamaa fi galgala gidduutti burkutaaʼu; tasumas bara baraan ni badu. ²¹Akka isaan ogummaa malee duʼaniif funyoon dunkaana isaanii hin luqqifamnee?’