욥기 38

내가 땅의 기초를 놓을 때에 네가 어디 있었느냐

¹तब याहवेह आँधीबेहरीको बीचबाट इयोबसँग बोल्नुभयो। उहाँले भन्‍नुभयो: ²“ज्ञानविनाका शब्दहरूले मेरो योजनालाई धमिल्याउने यो को हो? ³अब मर्दझैँ कम्मर कसेर खडा हो; म तँलाई प्रश्न गर्नेछु, अनि तैँले मलाई जवाफ दिनेछस्। ⁴“मैले पृथ्वीको जग बसाल्दा तँ कहाँ थिइस्? यदि तैँले बुझेको छस् भने मलाई भन्। ⁵पृथ्वीको नाप कसले गर्‍यो? निश्‍चय नै तँलाई थाहा होला! कसले यसको वरिपरि नाप्‍ने रेखा खिच्यो?

⁶पृथ्वीका खम्बाहरू केमाथि अड्याइएको छ, अथवा कसले त्यसको कुनेढुङ्गा बसाल्यो? ⁷जब बिहानको ताराहरूले एकसाथ गाउँदा र सारा स्वर्गदूतहरू आनन्दले जयजयकार गर्दा तँ कहाँ थिइस्? ⁸“पृथ्वीको गर्भबाट समुद्र फुटिनिस्कँदा, कसले समुद्रको ढोका थुनिदियो?

⁹जब मैले बादललाई पृथ्वीको वस्त्र बनाएँ, र यसलाई बाक्लो अन्धकारले लपेटिदिएँ, ¹⁰जब मैले यसको सिमाना तोकिदिएँ, र त्यसका ढोकाहरू र आग्लाहरू ठिक ठाउँमा राखिदिएँ, ¹¹तब मैले भनेँ, ‘तँ यतिसम्म मात्र आउन सक्छस् र यहाँभन्दा अगि होइन; अनि तेरा घमण्डी छालहरू यहाँ अडिऊन्।’ ¹²“के तैँले बिहानलाई कहिल्यै हुकुम गरेको छस्, अथवा प्रभातलाई त्यसको ठाउँ देखाएको छस्, ¹³ताकि यसले पृथ्वीको कुनाहरूमा पक्रोस्, र दुष्‍टहरूलाई हल्‍लाएर बाहिर फ्याँकोस्?

¹⁴चिम्टे माटोमा परेको छापजस्तै पृथ्वीले आकृति लिन्छ; त्यसका विशेषताहरू लुगाझैँ देखिन्छन्। ¹⁵दुष्‍ट मानिसहरूको ज्योति खोसिन्छ, र तिनीहरूका उठेका पाखुराहरू भाँचिन्छन्। ¹⁶“के तैँले कहिल्यै समुद्रका मुहानहरूभित्र यात्रा गरेको छस्? अथवा सागरको गहिराइमा हिँडेको छस्?

¹⁷के तँलाई मृत्युका ढोकाहरू देखाइएका छन्? के तैँले घोर अन्धकारका ढोकाहरू देखेको छस्? ¹⁸के तैँले पृथ्वी कति विशाल फैलिएको छ भनी जान्दछस्? यदि तैँले यी सबै कुरा जानेको छस् भने मलाई भन्। ¹⁹“ज्योतिको निवासको बाटो कहाँ छ? र अन्धकारले कहाँ बास बस्छ?

²⁰के तैँले तिनीहरू हरेकलाई तिनीहरूका ठाउँमा लैजान सक्छस्? के तँलाई तिनीहरूका वासस्थानहरूको बाटो थाहा छ? ²¹निश्‍चय नै तँलाई थाहा छ; किनकि तँ पहिल्यै नै जन्मिसकेको थिइस्! तँ कति धेरै वर्ष बाँचेको छस्! ²²“के तँ हिउँको भण्डारगृहमा प्रवेश गरेको छस्, अथवा असिनाको भण्डारगृह देखेको छस्; ²³जो मैले विपत्तिको समयको निम्ति, युद्ध र लडाइँका दिनहरूका निम्ति जम्मा गरेको छु?

²⁴कुन बाटो भएर बिजुली छरिएर निस्कन्छ, अथवा कुन ठाउँबाट पूर्वीय बतास पृथ्वीमा चारैतिर फैलिन्छ, के तँ जान्दछस्? ²⁵मुसलधारे वृष्‍टिको निम्ति कसले नहर खनेको छ? र चट्याङको निम्ति कसले बाटो तयार गरेको छ? ²⁶कोही मानिस नबस्‍ने जमिन, कोही बास नगरिएको मरुभूमिलाई भिजाउन, ²⁷उजाड मरुभूमिलाई प्रशस्त भिजाउन र त्यसमा हरियो घाँसहरू उमार्न, ²⁸के झरीको पिता छ? अथवा शीतका थोपाहरूलाई कसले जन्माएको हो?

²⁹कसको गर्भबाट हिउँ निस्कन्छ? आकाशबाट झर्ने तुसारोलाई कसले जन्माउँछ, ³⁰पानी कहिले ढुङ्गाजस्तै कडा हुन्छ, र कहिले गहिरो समुद्रको सतह बरफ बन्छ? ³¹“के तैँले किरकिटी ताराहरूलाई एकसाथ बाँध्न सक्छस्? अथवा के तैँले मृगशिराको बन्धनलाई फुकाल्न सक्छस्?

³²के तैँले तारामण्डललाई तिनीहरूका ऋतुअनुसार ठिकठिक ठाउँमा निकाल्न सक्छस्? अथवा सप्‍तर्षि तारा र त्यसका उपग्रहहरूलाई डोर्‍याउन सक्छस्? ³³के तैँले आकाशका नियमहरू जान्दछस्? के तैँले परमेश्‍वरको शासन पृथ्वीमा स्थापित गर्न सक्छस्? ³⁴“के तैँले आफ्नो सोर बादलसम्मै पुर्‍याउन सक्छस्, र आफूलाई पानीको भेलले ढाक्न सक्छस्?

³⁵के तैँले बिजुली चम्कनलाई त्यसको बाटोमा पठाउँछस्? के तँलाई तिनीहरूले, ‘हामी यहाँ हाजिर छौँ’ भनी भन्‍न आउँछन्? ³⁶कसले हृदयमा अन्तर्ज्ञान र दिमागलाई समझ दियो? ³⁷बादलहरूलाई गन्‍ने बुद्धि कोसँग छ? कसले आकाशका पानीका गाग्राहरूलाई घोप्ट्याउन सक्छ, ³⁸कहिले धुलो कडा हुन्छ, र माटोका ढिकाहरू एकसाथ टाँसिएर बस्छन्?

³⁹“के तैँले सिंहनीका निम्ति शिकार गरिदिन्छस्, र सिंहको भोकलाई तृप्‍त पार्न सक्छस्, ⁴⁰जब तिनीहरू आफ्नो गुफामा लुकेर बसेका हुन्छन्, अथवा झाडीमा ढुकेर बसेका हुन्छन्? ⁴¹जब कागका बचेराहरूले आहाराको अभावको कारण परमेश्‍वरलाई पुकार्दा, तब कसले कागलाई आहारा जुटाइदिन्छ?