욥기 36

하나님은 능하시고 가르치신다

U-Elihu waqhubeka esithi: ²“Ake lingibekezelele okwesikhatshana ukuze ngilitshengise ukuthi kunengi okumele kutshiwo ngobuhle bukaNkulunkulu. ³Ngiluzuza kude ulwazi lwami; ngithi ukwahlulela okulungileyo ngokukaMenzi wami.

⁴Yiba leqiniso ukuthi amazwi ami aqinisile; yena opheleleyo elwazini ulawe. ⁵UNkulunkulu ulamandla, kodwa keyisi muntu; ulamandla njalo katshedi ezimisweni zakhe. ⁶Ababi kabayekeli bephila kodwa abahluphekayo uyabapha okubafaneleyo.

⁷Kawasusi amehlo akhe kwabalungileyo; ubakhweza esihlalweni kanye lamakhosi abaphakamise nini lanini. ⁸Kodwa nxa abantu bebotshwe ngamaketane, bethiwe nko ngezibopho zezinhlupheko, ⁹uyabatshela lokho abakwenzileyo, ukuthi benze isono ngokuziphakamisa.

¹⁰Ubenza balalele ukuqondiswa abalaye ukuthi baphenduke ebubini babo. ¹¹Nxa bemlalela bamkhonze, zonke insuku zabo eziseleyo zizaphumelela, leminyaka yabo ibe ngeyokusuthiseka. ¹²Kodwa nxa bengalaleli, bazabhubha ngenkemba, bafe bengelalwazi.

¹³Abangamesabiyo uNkulunkulu bagodle ukusola enhliziyweni; loba angaze ababophe kabaceli ukusizwa. ¹⁴Bafa besesebatsha, bephakathi kweziphingi ezingamadoda, ezihlala ezindaweni zokukhonzela. ¹⁵Kodwa labo abahluphekayo uyabakhulula ekuhluphekeni kwabo; ukhuluma labo besezinkathazweni zabo.

¹⁶Uyakulimukisa ukuthi uphume emihlathini yosizi uye endaweni ebanzi, ekhululekileyo njalo engelazibopho, ebumnandini betafula yakho igcwele izidlo ezimnandi. ¹⁷Kodwa manje usindwa yikwahlulelwa okulungele ababi; ukuthonisiswa lokwahlulelwa ngokulunga yikho osekukuduba. ¹⁸Qaphela kungabikhona okulingayo ngenotho; ungavumeli ukuthengwa ngemali kukususe endleleni.

¹⁹Kambe inotho yakho loba konke ukutshikatshika kwakho kungakusekela ukuze ungangeni osizini na? ²⁰Ungalangazeleli ubusuku, ukuze uyohudula abantu ezindaweni zabo. ²¹Qaphela ungangeni kokubi, okukhanya ingathi uyakuthanda kulokuhlupheka.

²²UNkulunkulu uphakeme ngamandla akhe. Ngubani ongafundisa njengaye na? ²³Ngubani omisele izindlela zakhe na, loba othe kuye, ‘Usuwenze okungalunganga?’ ²⁴Khumbula ukukhulisa umsebenzi wakhe, abantu abawudumisileyo ngengoma.

²⁵Bonke abantu jikelele bakubonile lokhu; abantu bakukhangela bemi khatshana. ²⁶Ubukhulu bukaNkulunkulu bungaphezulu kokuzwisisa kwethu! Iminyaka yakhe ingezake yaziwe. ²⁷Uyawadonsa amathonsi amanzi, aqulungane abe lizulu elingena ezifuleni; ²⁸amayezi athulula amanzi awo kune izulu elikhulu ebantwini.

²⁹Ngubani ongakuzwisisa ukuthi uwendlala njani amayezi na, ukuthi ukhwaza njani esesiqongweni sakhe na? ³⁰Ake libone ukuthi uwuhlakaza njani umbane wakhe azizingelezele ngawo, abhukutshe ezinzikini zolwandle. ³¹Yiyo indlela abusa ngayo izizwe aziphe ukudla okunengi.

³²Ugcwalisa izandla zakhe ngombane awukhombise lapho omele utshaye khona. ³³Ukuduma kwakhe kubika isiphepho esizayo; lenkomo ziyatshengisa ukuza kwaso.”