욥기 16

너희는 다 재난을 주는 위로자들이로구나

UJobe wasephendula wathi: ²“Sengezwa izinto ezinengi ezifana lalezi; lingabaduduzi ababi lina lonke! ³Zizaphela nini inkulumo zokubhuda kwenu lokhu? Kuyini okulihluphayo laphikelela nje lidaza inkani?

⁴Lami bengingakhuluma njengani aluba yini elisesikhundleni sami; ngabe ngikhupha inkulumo ezimnandi ngilisola ngize nginikine ikhanda lami. ⁵Kodwa umlomo wami ngabe uyaliqinisa; induduzo yezindebe zami idedise inhlungu zenu. ⁶Kodwa nxa ngikhuluma, ubuhlungu obukimi kabudedi; loba ngingaze ngithule, kabupheli.

⁷Ngeqiniso, Nkulunkulu, usungiqede amandla; usuyitshabalalisile yonke imuli yami. ⁸Usungibophile sekuyibo ubufakazi balokho; lokucikizeka kwami kuyakhula kungilahla. ⁹UNkulunkulu uyanginxwanela angidlikize ngolaka lwakhe, angigedlele amazinyo; isitha sami singinyonkoloze ngamehlo ahlabayo.

¹⁰Abantu bavula imilomo yabo bengihoza; bangimakala esihlathini bengihlambaza babambane bangihlanganyele. ¹¹UNkulunkulu usenginikele ebantwini ababi wangiphosela ezandleni zezigangi. ¹²Konke kwakukuhle kimi, kodwa wangibhidliza; wangixhakalaza ngentamo wangichoboza. Usengenze ngaba yinto yakhe yokunenjwa; ¹³abacibi bemtshoko bakhe bangihanqile. Ungiciba izinso zami engelazwelo achithele inyongo yami phansi.

¹⁴Ungisukela njalonjalo; angidumele njengebutho. ¹⁵Sengithungele isembatho sesaka emzimbeni wami ngathukuza ibunzi lami othulini. ¹⁶Ubuso bami sebubomvu ngokukhala, amathunzi anzima ahonqolozela amehlo ami; ¹⁷kodwa izandla zami kaziluqhelanga udlakela, lomkhuleko wami uhlanzekile.

¹⁸Awu mhlaba, ungaligqibeli igazi lami; sengathi lokukhala kwami kungaze kwacitshwa lanini! ¹⁹Lakhathesi ufakazi wami usezulwini; umeli wami uphezulu khonale. ²⁰Umeli wami ngumngane wami nxa amehlo ami empompoza inyembezi kuNkulunkulu; ²¹uyamncengela umuntu kuNkulunkulu njengomuntu encengela umngane wakhe.

²²Kusasele iminyakana engemingaki andubana ngiye lapho kungabuywa khona.”