이사야 6

내가 여기 있나이다 나를 보내소서

¹जऊन बछर उजियाह राजा ह मरिस, मेंह परभू ला ऊंचहा अऊ महिमा के संग एक सिंघासन म बिराजमान देखेंव; अऊ ओकर ओनहा के घेरा ले मंदिर ढंपा गे रिहिस। ²ओकर ऊपर म सारापमन रहंय, अऊ हर एक के छै-छै ठन डेना रहंय: दू ठन डेना ले ओमन अपन मुहूं ला अऊ दू ठन डेना ले अपन गोड़मन ला ढांपे रहंय, अऊ दू ठन डेना ले ओमन उड़त रहंय। ³अऊ ओमन एक-दूसर ला नरिया-नरियाके कहत रिहिन: “सर्वसक्तिमान यहोवा ह पबितर, पबितर, पबितर ए; पूरा धरती ह ओकर महिमा ले भरे हवय।” ⁴ओमन के अवाज ले दुवार अऊ चौखटमन डोल गीन, अऊ मंदिर ह धुआं ले भर गीस। ⁵तब मेंह चिचियाके कहेंव, “मोर ऊपर हाय! मेंह नास हो गेंव! काबरकि मेंह असुध ओंठवाला मनखे अंव, अऊ मेंह असुध ओंठवाले मनखेमन के बीच म रहिथंव, अऊ मोर आंखीमन राजा, सर्वसक्तिमान यहोवा ला देखे हवंय।” ⁶तब एक ठन साराप ह हांथ म एक ठन बरत अंगरा ला धरके मोर करा उड़ियाके आईस; ओह ओ अंगरा ला बेदी म ले चिमटा ले उठाय रिहिस। ⁷ओह ओ अंगरा ले मोर मुहूं ला छूके कहिस, “देख, येह तोर ओंठ ला छुये हवय; तोर अपराध ह दूर हो गे हवय अऊ तोर पाप ला छेमा कर दिये गे हवय।” ⁸तब मेंह परभू के अवाज ला ये कहत सुनेंव, “मेंह कोन ला पठोवंव? अऊ कोन ह हमर बर जाही?” त मेंह कहेंव, “मेंह इहां हंव। मोला पठो।”

⁹ओह कहिस, “जा, अऊ ये मनखेमन ला कह: “ ‘सुनत ही रहव, पर कभू झन समझव; देखत ही रहव, पर कभू झन बुझव।’ ¹⁰ये मनखेमन के मन ला कठोर, ओमन के कान ला भारी अऊ ओमन के आंखीमन ला बंद कर दे। अइसन झन होवय कि ओमन अपन आंखी ले देखंय, अपन कान ले सुनंय, अपन मन म समझंय अऊ मन फिराके चंगा हो जावंय।” ¹¹तब मेंह पुछेंव, “हे परभू, कब तक?” ओह जबाब दीस: “जब तक नगरमन उजड़ नइं जावंय अऊ उहां कोनो झन बचंय, जब तक घरमन ला खाली नइं छोंड़ दिये जावय अऊ खेतमन बरबाद होके नास नइं हो जावंय, ¹²जब तक यहोवा ह हर एक जन ला उहां ले दूरिहा नइं कर देवय अऊ देस ला पूरा तियाग नइं दिये जावय। ¹³अऊ हालाकि मनखेमन के दसवां हिस्सा उहां रही जाथे, तभो ले येला फेर नास करे जाही। पर जइसे छोटे अऊ बड़े बलूत रूख ला काटे के बाद घलो ओकर ठूंठ ह बांच जाथे, वइसे ही पबितर बीजा ह ओ देस के ठूंठ होही।”