시편 76

하나님은 유다에 알려지셨으며

¹संगीत के निरदेसक बर। तारवाले बाजामन के संग आसाप के एक भजन। एक गीत। यहूदा म परमेसर ह प्रसिद्ध हे; इसरायल म ओकर नांव ह महान ए। ²सालेम म ओकर डेरा हवय, अऊ सियोन म ओकर निवास स्थान। ³उहां ओह चमचमात तीर, ढाल अऊ तलवार, याने कि लड़ई के हथियारमन ला टोर दीस। ⁴तेंह अंजोर ले चमकत हस, सिकार ले भरे पहाड़मन ले जादा सानदार अस। ⁵हिम्मती मनखेमन लूट लिये गीन, ओमन अपन मिरतू के नींद म हवंय; योद्धामन ले एको झन घलो अपन हांथ नइं चला सकंय। ⁶हे याकूब के परमेसर, तोर डांट के कारन, घोड़ा अऊ रथ दूनों खड़े हवंय। ⁷येह सिरिप तेंहीच अस, जेकर भय माने जावय। जब तेंह गुस्सा करथस, त तोर आघू म कोन ह ठाढ़ हो सकथे?

⁸स्वरग ले तेंह नियाय के घोसना करय, अऊ देस के मनखेमन डरके चुप हो गीन— ⁹हे परमेसर, जब तेंह देस के दुख म परे जम्मो मनखेमन के नियाय करे बर अऊ ओमन ला बचाय बर उठय। ¹⁰खचित मानव-जाति के बिरूध तोर कोप ह तोर परसंसा के कारन बनथे, अऊ तोर कोप ले बचे मनखेमन काबू म रहिथें। ¹¹यहोवा अपन परमेसर बर मन्नत मानव अऊ ओला पूरा करव; आसपास के जम्मो देस के मनखेमन परमेसर करा भेंट लेके आवंय जऊन ह भय माने के योग्य अय। ¹²ओह सासन करइयामन के उत्साह ला टोर देथे; धरती के राजामन ओकर भय मानथें।