잠언 3

너는 마음을 다하여 여호와를 신뢰하라

Сыне мой, не забывайся настаўленьня майго, і няхай сэрца тваё захоўвае прыказаньні мае, ²бо доўгія дні, гады жыцьця і супакой прынясуць яны табе. ³Міласэрнасьць і праўда няхай не пакідаюць цябе, абвяжы імі шыю сабе і напішы іх на табліцах сэрца твайго, ⁴і знойдзеш ты ласку і спагаднасьць у вачах Бога і людзей.

⁵Спадзявайся на ГОСПАДА ўсім сэрцам тваім і не абапірайся на розум твой. ⁶Думай пра Яго на ўсіх шляхах тваіх, і Ён выпрастуе сьцежкі твае. ⁷Ня будзь мудры ў вачах сваіх, бойся ГОСПАДА і пазьбягай ліхоты.

⁸Гэта будзе здароўем для цела твайго і спасіленьнем для костак тваіх. ⁹Шануй ГОСПАДА ўсёй маёмасьцю тваёй і пяршынамі ўсіх пладоў тваіх, ¹⁰і напоўняцца гумны твае збожжам, а тоўчні твае перапоўняцца новым віном.

¹¹Не адкідай, сыне мой, настаўленьня ГОСПАДА, і не ўхіляйся, калі Ён дакарае цябе, ¹²бо каго любіць ГОСПАД, таго карае, як бацька, які спагадае сыну.

지혜는 진주보다 귀하다

¹³Шчасьлівы чалавек, які знайшоў мудрасьць, і чалавек, які прыдбаў разуменьне. ¹⁴Бо здабыць яе лепш, чым здабыць срэбра, і плады ейныя лепшыя за золата. ¹⁵Яна — каштоўнейшая за пэрліны, і нішто з таго, што ты прагнеш, ня можа параўнацца з ёю.

¹⁶Доўгасьць дзён у правай руцэ яе, а ў левай руцэ — багацьце і слава. ¹⁷Шляхі яе — шляхі прыемныя, і ўсе сьцежкі ейныя — супакой. ¹⁸Яна — дрэва жыцьця для тых, што трымаюцца яе, шчасьлівыя тыя, якія абапіраюцца на яе.

¹⁹ГОСПАД мудрасьцю заснаваў зямлю, нябёсы ўмацаваў розумам. ²⁰Яго веданьнем расчыніліся бяздоньні і аблокі імгляць расою. ²¹Сыне мой, няхай гэта не адыходзіць ад вачэй тваіх, захоўвай разумнасьць і разважнасьць.

²²І яны стануцца жыцьцём для душы тваёй і аздобаю для шыі тваёй. ²³Тады пойдзеш бясьпечна шляхам тваім, і нага твая не пахісьнецца. ²⁴Калі ляжаш спаць, ня будзеш мець страху, і калі засьнеш, сон твой будзе салодкі.

²⁵Не спалохаешся раптоўнага страху і загубы бязбожнікаў, калі яна прыйдзе, ²⁶бо ГОСПАД будзе спадзяваньнем тваім і захавае нагу тваю ад пасткі. ²⁷Не адмаўляй у дабрадзействе таму, хто патрабуе, калі рука твая мае сілу зрабіць гэта.

²⁸Не кажы бліжняму твайму: «Ідзі сабе і прыйдзі зноў, заўтра дам табе», калі маеш гэта пры сабе. ²⁹Не надумляй ліхоцьця супраць бліжняга твайго, калі ён жыве пры табе бясьпечна. ³⁰Не сварыся з чалавекам без прычыны, калі ён не зрабіў табе нічога благога.

³¹Не зайздросьці чалавеку злачыннаму і не выбірай ніводнага са шляхоў ягоных, ³²бо ГОСПАД брыдзіцца крывадушным, а з правымі Ён сябруе. ³³Праклён ад ГОСПАДА на доме бязбожніка, але жытло праведных Ён дабраслаўляе.

³⁴Ён сьмяецца з насьмешнікаў, а пакорным ласку дае. ³⁵Мудрыя атрымаюць у спадчыну славу, а бязглуздыя будуць насіць ганьбу.