Salmos 115

Não a nós, Senhor, mas ao teu nome

Ня нам, ГОСПАДЗЕ, ня нам, але іменьню Твайму дай Ты славу дзеля міласэрнасьці Тваёй, дзеля праўды Тваёй! ²Навошта казаць паганам: «Дзе ж Бог іхні?» ³А Бог наш у небе; усё, што Яму даспадобы, Ён робіць.

⁴Ідалы іхнія — срэбра і золата, творы рук чалавечых. ⁵Маюць вусны, і не гавораць; маюць вочы, і ня бачаць; ⁶маюць вушы, і ня чуюць, маюць ноздры, і нюху няма; ⁷рукі ў іх, і ня мацаюць; ногі ў іх, і ня ходзяць; і не выказваюцца горлам сваім.

⁸Няхай стануцца падобнымі да іх тыя, што іх робяць, усе, што на іх спадзяюцца. ⁹Ізраілю, спадзявайся на ГОСПАДА. Ён — дапамога іхняя і шчыт іх! ¹⁰Доме Аарона, спадзявайся на ГОСПАДА. Ён — дапамога іхняя і шчыт іх!

¹¹Вы, што ГОСПАДА баіцёся, спадзявайцеся на ГОСПАДА. Ён — дапамога іхняя і шчыт іх! ¹²ГОСПАД памятае пра нас. Ён будзе дабраслаўляць, Ён будзе дабраслаўляць дом Ізраіля, Ён будзе дабраслаўляць дом Аарона, ¹³Ён будзе дабраслаўляць тых, што баяцца ГОСПАДА, разам малых і вялікіх.

¹⁴Няхай памножыць вас ГОСПАД, вас і сыноў вашых. ¹⁵Дабраслаўлёныя вы ГОСПАДАМ, Які стварыў неба і зямлю. ¹⁶Неба — неба ГОСПАДА, а зямлю Ён даў сынам чалавечым.

¹⁷Ня мёртвыя хваляць ГОСПАДА, ня ўсе тыя, што зыходзяць у [месца] маўчаньня, ¹⁸але мы будзем дабраслаўляць ГОСПАДА ад цяпер і на вякі. Альлелюя!