Gênesis 36

A descendência de Esaú

Caychömi isquirbiraycaran Esaüpita mirajcunapa willapan. Esaüpaga jucaj jutin caran Edom. ²Esaüga majachacaran Cananea warmicunawan: Elón jutiyoj Het runapa wamran Adawan; Heb runa Anäpa wamran Aholibamawan. Payga caran Zibeonpa willcan. ³Ismaelpa wamran Basematwanpis majachacaran. Basematga caran Nebaiotpa pañin.

⁴Esaüpa warmin Adacho cäga wamran caran Elifaz. Basematcho cajna caran Reuel. ⁵Aholibamacho cajna caran Jeús, Jaalam, Coré. Paycunaga Canaán particho Esaú tiyaycaptillanna yuriran. ⁶Wauguin Jacobpa ñaupancho tiyaycashanpita witicur Esaüga aywacuran llapan warmincunata, wamrancunata, paywan tiyaj runacunatapis pushacurcur. Canaancho tiyar tarishan cajtaga llapanta apacuran.

⁷Wauguinwan ishcan chay pachallachöga manana tiyayta puydirannachu. Ishcanpa ima-aycanpis aypallana caran. Paycuna tiyashan cajcho manana guewapis ayparannachu uywancuna micunanpaj. ⁸Chaynöpa Edom jutiyoj Esaú castacunaga llapan aywacuran Seir particho caycaj jircacunaman. ⁹Esaüga Edom runacunapa unay awilunmi. Edom runacunaga tiyaran Seir particho caycaj jircacunachömi.

¹⁰Esaüpa warmin Adacho yuriran Elifaz. Warmin Basematchönami yuriran Reuel. ¹¹Elifazpa wamrancunanami caran: Temán, Omar, Zefo, Gatam, Cenaz. ¹²Elifazpa uywaycaj warmin Timnachöpis Amalec jutiyoj wamran caran. Chaycunaga llapanpis caran Esaüpa jucaj warmin Adapita mirajcunalla.

¹³Reuelpa wamrancuna caran: Nahat, Zera, Sama, Miza. Paycunapis caran Esaüpa jucaj warmin Basematpita mirajcuna. ¹⁴Esaüpa warmin Aholibamacho caj wamrancuna caran cayno: Jeús, Jaalam, Coré. Aholibamaga caran Anapa wamran, Zibeonpa willcan. ¹⁵Esaüpa guechpa wamran Elifazpa wamrancunapis mandaj caran. Paycuna caran Temán, Omar, Zefo, Cenaz, ¹⁶Coré, Gatam, Amalec. Chay mandajcunaga llapanpis caran Elifazpa wamrancunami. Paycuna mandaj caran Edom nasyunchömi. Paycunaga caran Esaüpawan warmin Adapa willcanmi.

¹⁷Esaüpa wamran Reuelpa wamrancunapis mandaj caran. Paycuna caran Nahat, Zera, Sama, Miza. Chay mandajcunaga llapanpis caran Esaüpawan warmin Basematpa willcanmi. ¹⁸Esaüpa jucaj warmin Aholibamapa wamrancunami mandaj caran. Paycuna caran Jeús, Jaalam, Coré. Aholibamaga Aná jutiyoj runapa wamranmi caran. ¹⁹Chay mandajcunaga llapanpis caran Esaú castami. Paycunapita mirajcunami Edom runacuna caycan.

Os filhos de Seir

²⁰Edom partiman Esaú manaraj chayaptin chaycho tiyaran Hor runacunami. Paycunaga miraran Seir jutiyoj runapitami. Seirpa wamrancunami caran Lotán, Sobal, Zibeón, Aná, Disón, Ezer, Disán. Paycunami caran Hor runacunapa mandajnincuna. ²¹Seirpa wamran Lotanpa wamrancunanami caran Horiwan Hemam. Chaynömi Lotanpa pañin caran Timna. ²²Sobalpa wamrancunami caran Alván, Manahat, Ebal, Sefo, Onam.

²³Zibeonpa wamrancunami caran Ajawan Aná. Taytan Zibeonpa bürruncunata michiycashanchömi Aná tariran pucyuta chaqui jircacho. ²⁴Anäpa wamrancuna caran warmi ollgu. Ollgu cajpa jutin caran Disón, warmi cajpana Aholibama. ²⁵Disonpa wamrancunanami caran Hemdán, Esbán, Itrán, Querán.

²⁶Ezerpa wamrancunami caran Bilhán, Zaaván, Acán. ²⁷Disanpa wamrancunanami caran Uzwan Arán. ²⁸Hor runacunapa mandajnincuna caran Lotán, Sobal, Zibeón, Aná, ²⁹Disón, Ezer, Disán. Chay runacunaga cada-ünun mandaj caran Hor casta runacunacho. Cada castapa jutenga mandajninpa jutin cashannömi caran. Chay castacunami shuyni-shuyni Seir particho tiyaran.

³⁰Israel nasyuncho ray manaraj captinmi Edom nasyunchöga raycuna caran. Caynömi chay raycuna caran.

Os reis de Edom

³¹Juc ray caran Beorpa wamran Bela. Belapa marcanmi caran Dinaba. ³²Bela wañuptinnami Zerapa wamran Jobab ray caran. Payga caran Bosra marcapitami. ³³Jobab wañuptinna paypa ruquin ray caran Husam. Payga caran Temán marcapitami.

³⁴Husam wañuptinnami ruquin ray caran Bedadpa wamran Hadad. Paymi Moab-wichaycho wañuchiran Madián runacunata. Hadadpa marcanmi caran Avit. ³⁵Hadad wañuptinnami ruquin ray caran Samla. Payga caran Masreca marcapitami. ³⁶Samla wañuptinnami ray caran Saúl. Payga caran Éufrates mayu läduncho caycaj Rehobot marcapitami.

³⁷Saúl wañuycuptinnami ray caran Acborpa wamran Baal-hanán. ³⁸Baal-hanán wañuycuptinnami ray caran Hadar. Payga caran Pau siudäpitami. Hadarpa warminpa jutinmi caran Mehetabel. Mehetabelga caran Matred runapa wamranmi, Mezaab runapana willcan. ³⁹Esaüpita mirajcunapa castancunapa mandajnincuna caran Timna, Alva, Jetet, ⁴⁰Aholibama, Ela, Pinón, ⁴¹Cenaz, Temán, Mibzar, ⁴²Magdiel, Iram. Chay mandajcunami tiyashan partichöga mandaran. Chaynöpis chay castacuna tiyashan marcacunaga mandajninpa jutillantami aparan. Llapan chay runacunaga Edom runacunami caycan.