Salmos 116

Amo o Senhor, porque ele me ouviu

E aroha ana ahau ki a Ihowā; mōna i whakarongo ki tōku reo, ki āku īnoi. ²I tahuri mai tōna taringa ki ahau; mō reira ka karanga ahau ki a ia i ahau e ora ana. ³I karapotia ahau e ngā whakawiringa a te mate; mau pū ahau i ngā mamae o te rēinga, i kite ahau i te pāwera, i te pōuri.

⁴Nā, ko tāku karangatanga ki te ingoa o Ihowā: “Tēnā rā, e Ihowā, whakaorangia tōku wairua!” ⁵He atawhai a Ihowā, he tika; āe, he aroha tō tātou Atua. ⁶E tiakina ana e Ihowā te hunga kūware; i whakaititia ahau, ā, nāna ahau i whakaora.

⁷E hoki, e tōku wairua, ki tōu okiokinga; kua atawhaitia hoki koe e Ihowā. ⁸Nāu hoki tōku wairua i whakaora kei mate, ōku kanohi kei whai roimata, ōku waewae kei paheke. ⁹Tērā ahau e hāereere i te aroaro o Ihowā i te whenua o te ora.

¹⁰I whakapono ahau, koia ahau i kōrero ai; “He nui tōku whakawhiunga.” ¹¹I mea ahau i tōku ohoreretanga, “He teka kau ngā tāngata katoa.” ¹²He aha tāku e whakahoki ai ki a Ihowā mō āna atawhainga katoa i ahau?

¹³Ka mau ahau ki te kapu o te whakaoranga, ka karanga ki te ingoa o Ihowā. ¹⁴Ka whakamanā e ahau āku kupu taurangi ki a Ihowā i te aroaro o tāna iwi katoa. ¹⁵He mea utu nui ki tā Ihowā titiro te matenga o tāna hunga tapu.

¹⁶E Ihowā, he pono ko ahau tāu pononga; ko ahau tāu pononga, ko te tama a tāu pononga wahine; nāu i wewete ōku here. ¹⁷Ka tukua e ahau te patunga tapu, arā te whakawhetai; ka karanga ki te ingoa o Ihowā. ¹⁸Ka whakamanā e ahau āku kupu taurangi ki a Ihowā, āe, ki te aroaro o tāna iwi katoa, ¹⁹ki ngā marae o te whare o Ihowā, ki waenganui ōu, e Hiruhārama. Whakamoemititia a Ihowā!