Isaías 63
Quem é este que vem de Edom
1येह कोन ए, जऊन ह एदोम देस के बोसरा नगर ले आवत हे जेकर ओनहा म गहिरा लाल रंग के धब्बामन लगे हवंय? येह कोन ए, जऊन ह सोभायमान ओनहा पहिरे, अपन बड़े ताकत म, लम्बा कदम डालत चले आवत हे? “येह में अंव, जऊन ह जय के घोसना करत हंव, अऊ मेंह उद्धार करे के सक्ति रखथंव।” 2तुम्हर ओनहा ह काबर लाल हवय, जइसन रसकुंड म अंगूर खुंदत बेरा मनखेमन के होथे? 3“मेंह अकेला रसकुंड म अंगूर रऊंदे हंव; अऊ कोनो मनखे मोर संग नइं रिहिन। मेंह अपन रिस म आके ही ओमन ला खुंदेंव अऊ अपन कोप म मेंह ओमन ला कुचरेंव; ओमन के लहू के छींटा मोर ओनहा म पड़िस, अऊ मोर पूरा पहिरावा म दाग लग गीस। 4येह मोर बर बदला लेय के दिन रिहिस; मोर बर छोंड़ाय के बछर ह आ गे रिहिस। 5मेंह खोजेंव पर कोनो मदद करइया नइं रिहिन, मेंह डरा गेंव कि कोनो मोर मदद नइं करिन; तब मेंह अपनेच भुजबल ले उद्धार करेंव अऊ मोर खुद के कोरोध ह मोला संभालिस। 6हां, अपन रिस म आके देस-देस के मनखेमन ला कुचरेंव; अपन रिस म, मेंह ओमन ला मतवाला कर देंव, अऊ ओमन के लहू ला भुइयां म बोहा देंव।”
Falarei das suas misericórdias
7मेंह यहोवा के दया के काम के बखान करहूं, ओ काम जेकर कारन ओकर गुनगान होना चाही, हमर बर यहोवा के करे गय ओ जम्मो काम के मुताबिक ओकर गुनगान होवय— हव, अपन बहुंते दया अऊ करूना के कारन ओह इसरायल बर बहुंते भलई के काम करे हवय। 8यहोवा ह कहिस, “सही म ओमन मोर मनखे अंय, अइसन लइका, जेमन मोर बर ईमानदार रहिहीं”; अऊ ओह ओमन के उद्धारकर्ता हो गीस। 9ओमन के सबो दुख म ओह घलो दुख उठाईस, अऊ ओकर उपस्थिति के स्वरगदूत ह ओमन के उद्धार करिस। अपन मया अऊ दया के कारन ओह ओमन ला छोंड़ाईस; ओह ओमन ला उठाईस अऊ पुराना समय ले ओमन ला उठाके चलिस। 10तभो ले ओमन बिदरोह करिन अऊ ओकर पबितर आतमा ला दुखित करिन। एकर कारन ओह पलटके ओमन के बईरी हो गीस अऊ ओह खुद ओमन ले लड़े लगिस। 11तब ओकर मनखेमन पुराना दिनमन ला, याने कि मूसा अऊ ओकर मनखेमन के दिनमन ला सुरता करके कहिन— ओह कहां हवय, जऊन ह ओमन ला समुंदर म ले होवत अपन झुंड के चरवाहा के संग ले आईस? ओह कहां हवय, जऊन ह ओमन के बीच म अपन पबितर आतमा डारिस, 12जऊन ह अपन परतापी भुजबल ला मूसा के जेवनी हांथ म कर दीस, जऊन ह ओमन के आघू म पानी ला दू भाग करके अपन बर सदाकाल के जस कमाईस, 13जऊन ह ओमन ला गहिला समुंदर म ले होके ले गीस? जइसन घोड़ा ला खुला मैदान म ठोकर नइं लगय, वइसन ही ओमन ला घलो ठोकर नइं लगिस; 14जइसन घरेलू-पसुमन खाल्हे मैदान म चले जाथें, वइसन ही यहोवा के आतमा ह ओमन ला आराम दीस। अपन एक महिमामय नांव बनाय बर ये किसम ले तेंह अपन मनखेमन के अगुवई करे।
Olha do céu
15स्वरग ले, अपन ऊंच सिंघासन ले, जऊन ह पबितर अऊ महिमा ले भरे हवय, उहां ले खाल्हे देख। तोर जलन अऊ पराकरम कहां हवय? तोर दया अऊ करूना हमर ऊपर ले हट गे हवय। 16पर तें हमर ददा अस, हालाकि अब्राहम हमन ला नइं जानय या इसरायल हमन ला गरहन नइं करय; तभो ले, हे यहोवा, तें हमर ददा अऊ हमर छुड़इया अस; पुराना जमाना ले ये तोर नांव अय। 17हे यहोवा, तें काबर हमन ला अपन रद्दा ले भटका देथस अऊ हमर मन ला कठोर कर देथस कि हमन तोर भय नइं मानन? अपन दासमन के हित म, ओ गोत्रमन, जेमन तोर निज भाग अंय, ओमन के हित म लहुंट आ। 18थोरकन समय तक तोर मनखेमन तोर पबितर जगह ऊपर अधिकार रखिन, पर हमर बईरीमन तोर पबितर-स्थान ला कुचर दे हवंय। 19पुराना जमाना ले हमन तोर अन; पर हमन तो अइसे हो गे हन मानो तेंह हमर ऊपर कभू परभूता नइं करे, अऊ हमन तोर नांव ले कभू बलाय नइं गे हवन।