Provérbios 6

O preguiçoso e a formiga

בְּנִי אִם־עָרַבְתָּ לְרֵעֶךָ; תָּקַעְתָּ לַזָּר כַּפֶּיךָ׃ ²נוֹקַשְׁתָּ בְאִמְרֵי־פִיךָ; נִלְכַּדְתָּ, בְּאִמְרֵי־פִיךָ׃ ³עֲשֵׂה זֹאת אֵפוֹא בְּנִי וְהִנָּצֵל, כִּי בָאתָ בְכַף־רֵעֶךָ; לֵךְ הִתְרַפֵּס, וּרְהַב רֵעֶיךָ׃ ⁴אַל־תִּתֵּן שֵׁנָה לְעֵינֶיךָ; וּתְנוּמָה, לְעַפְעַפֶּיךָ׃ ⁵הִנָּצֵל כִּצְבִי מִיָּד; וּכְצִפּוֹר, מִיַּד יָקוּשׁ׃ פ ⁶לֵךְ־אֶל־נְמָלָה עָצֵל; רְאֵה דְרָכֶיהָ וַחֲכָם׃ ⁷אֲשֶׁר אֵין־לָהּ קָצִין, שֹׁטֵר וּמֹשֵׁל׃ ⁸תָּכִין בַּקַּיִץ לַחְמָהּ; אָגְרָה בַקָּצִיר, מַאֲכָלָהּ׃

⁹עַד־מָתַי עָצֵל תִּשְׁכָּב; מָתַי, תָּקוּם מִשְּׁנָתֶךָ׃ ¹⁰מְעַט שֵׁנוֹת מְעַט תְּנוּמוֹת; מְעַט חִבֻּק יָדַיִם לִשְׁכָּב׃ ¹¹וּבָא־כִמְהַלֵּךְ רֵאשֶׁךָ; וּמַחְסֹרְךָ, כְּאִישׁ מָגֵן׃ פ ¹²אָדָם בְּלִיַּעַל אִישׁ אָוֶן; הוֹלֵךְ, עִקְּשׁוּת פֶּה׃ ¹³קֹרֵץ בְּעֵינָיו מֹלֵל בְּרַגְלָו; מֹרֶה, בְּאֶצְבְּעֹתָיו׃ ¹⁴תַּהְפֻּכוֹת בְּלִבּוֹ, חֹרֵשׁ רָע בְּכָל־עֵת; (מדנים) מִדְיָנִים יְשַׁלֵּחַ׃ ¹⁵עַל־כֵּן, פִּתְאֹם יָבוֹא אֵידוֹ; פֶּתַע יִשָּׁבֵר, וְאֵין מַרְפֵּא׃ פ ¹⁶שֶׁשׁ־הֵנָּה שָׂנֵא יְהוָה; וְשֶׁבַע, (תועבות) תּוֹעֲבַת נַפְשׁוֹ׃

¹⁷עֵינַיִם רָמוֹת לְשׁוֹן שָׁקֶר; וְיָדַיִם, שֹׁפְכוֹת דָּם־נָקִי׃ ¹⁸לֵב, חֹרֵשׁ מַחְשְׁבוֹת אָוֶן; רַגְלַיִם מְמַהֲרוֹת, לָרוּץ לָרָעָה׃ ¹⁹יָפִיחַ כְּזָבִים עֵד שָׁקֶר; וּמְשַׁלֵּחַ מְדָנִים, בֵּין אַחִים׃ פ

O fogo que não se pode carregar

²⁰נְצֹר בְּנִי מִצְוַת אָבִיךָ; וְאַל־תִּטֹּשׁ, תּוֹרַת אִמֶּךָ׃ ²¹קָשְׁרֵם עַל־לִבְּךָ תָמִיד; עָנְדֵם, עַל־גַּרְגְּרֹתֶךָ׃ ²²בְּהִתְהַלֶּכְךָ תַּנְחֶה אֹתָךְ, בְּשָׁכְבְּךָ תִּשְׁמֹר עָלֶיךָ; וַהֲקִיצוֹתָ, הִיא תְשִׂיחֶךָ׃ ²³כִּי נֵר מִצְוָה וְתוֹרָה אוֹר; וְדֶרֶךְ חַיִּים, תּוֹכְחוֹת מוּסָר׃ ²⁴לִשְׁמָרְךָ מֵאֵשֶׁת רָע; מֵחֶלְקַת, לָשׁוֹן נָכְרִיָּה׃ ²⁵אַל־תַּחְמֹד יָפְיָהּ בִּלְבָבֶךָ; וְאַל־תִּקָּחֲךָ, בְּעַפְעַפֶּיהָ׃ ²⁶כִּי בְעַד־אִשָּׁה זוֹנָה, עַד־כִּכַּר לָחֶם וְאֵשֶׁת אִישׁ; נֶפֶשׁ יְקָרָה תָצוּד׃ פ ²⁷הֲיַחְתֶּה אִישׁ אֵשׁ בְּחֵיקוֹ; וּבְגָדָיו, לֹא תִשָּׂרַפְנָה׃

²⁸אִם־יְהַלֵּךְ אִישׁ עַל־הַגֶּחָלִים; וְרַגְלָיו, לֹא תִכָּוֶינָה׃ ²⁹כֵּן, הַבָּא אֶל־אֵשֶׁת רֵעֵהוּ; לֹא יִנָּקֶה, כָּל־הַנֹּגֵעַ בָּהּ׃ ³⁰לֹא־יָבוּזוּ לַגַּנָּב כִּי יִגְנוֹב; לְמַלֵּא נַפְשׁוֹ, כִּי יִרְעָב׃ ³¹וְנִמְצָא יְשַׁלֵּם שִׁבְעָתָיִם; אֶת־כָּל־הוֹן בֵּיתוֹ יִתֵּן׃ ³²נֹאֵף אִשָּׁה חֲסַר־לֵב; מַשְׁחִית נַפְשׁוֹ, הוּא יַעֲשֶׂנָּה׃ ³³נֶגַע־וְקָלוֹן יִמְצָא; וְחֶרְפָּתוֹ, לֹא תִמָּחֶה׃ ³⁴כִּי־קִנְאָה חֲמַת־גָּבֶר; וְלֹא־יַחְמוֹל, בְּיוֹם נָקָם׃ ³⁵לֹא־יִשָּׂא פְּנֵי כָל־כֹּפֶר; וְלֹא־יֹאבֶה, כִּי תַרְבֶּה־שֹׁחַד׃ פ