Provérbios 24

Não invejes os maus

Pa fè anvi a moun mechan, ni dezire pou avèk yo; ²paske panse yo fòmante vyolans e lèv yo pale inikite. ³Avèk sajès, kay la bati e avèk bon konprann, li vin etabli.

⁴Pa konesans, chanm yon moun vin ranpli avèk tout bèl kalite richès. ⁵Yon nonm saj byen fò, e yon nonm ak konesans ogmante pouvwa li. ⁶Paske ak konsèy saj ou va fè lagè, e ak konseye an abondans, gen viktwa.

⁷Sajès twò wo pou moun ensanse a; li pa ouvri bouch li nan pòtay la. ⁸Yon moun ki fè plan pou fè mal, moun va rele li magouyè. ⁹Fòmante foli se peche, e mokè a abominab a tout moun.

¹⁰Si ou lach nan jou gran pwoblèm nan, fòs ou pa fò. ¹¹Delivre sila k ap mennen vè lanmò a, ak sila k ap mache tonbe vè labatwa a. O, kenbe yo! ¹²Si ou di: “Gade, nou pa t konnen sa”; èske Li pa konsidere sa, sila ki peze kè? Epi èske Li pa konnen sa, sila kap kenbe nanm ou an? Èske Li p ap rann a lòm selon zèv li?

¹³Fis mwen, manje siwo myèl, paske li bon; wi, siwo sòti nan nich lan dous pou goute. ¹⁴Konnen ke sajès se konsa pou nanm ou; si ou twouve li, va gen yon avni, e espwa ou p ap anile. ¹⁵Pa kouche mete pyèj, o lòm mechan, kont kote ke moun dwat la rete a. Pa detwi kote repo li a; ¹⁶paske yon nonm ladwati tonbe sèt fwa e leve ankò, men se nan lè gwo malè ke mechan an tonbe.

¹⁷Pa rejwi lè lènmi ou tonbe. Ni pa kite kè ou kontan lè l tonbe; ¹⁸Oswa, SENYÈ a va wè l, vin pa kontan e detounen kòlè Li de li. ¹⁹Pa twouble tèt ou pou malveyan yo, ni fè lanvi pou mechan yo, ²⁰paske pou yon nonm mechan, pa gen avni. Lanp a mechan an va etenn nèt.

²¹Fis mwen an, gen lakrent SENYÈ a ak wa a; pa asosye ak sila ki pa stab yo, ²²paske, malè yo va leve vit. Kilès ki konnen destriksyon an k ap sòti nan yo de a.

Mais ditos dos sábios

²³Sila yo, anplis, se pawòl a sajès: Fè patipri nan jijman pa bon. ²⁴Sila ki di a mechan an: “Ou dwat”, pèp yo va modi li e nasyon yo va rayi li; ²⁵men pou sila ki repwoche mechan yo, l ap wale byen ak yo. Bon benediksyon va tonbe sou yo.

²⁶Yon repons onèt tankou yon bo sou lèv yo. ²⁷Prepare tout travay ou a deyò; byen prepare chan ou. Apre, alò, bati kay ou. ²⁸Pa vin yon temwen kont vwazen ou san koz, e pa bay manti ak lèv ou.

²⁹Pa di: “Se konsa mwen va fè l paske li te fè m konsa; mwen va rann a nonm nan selon zèv li yo.” ³⁰Mwen te pase nan chan parese a; akote chan rezen a nonm ki manke bon konprann nan. ³¹Epi gade byen, li te plen ak raje pikan, e kouvri ak move zèb, Miray an wòch la te fin kraze nèt.

³²Lè m te wè, mwen te reflechi sou sa; mwen te gade e m te resevwa enstriksyon. ³³“Yon ti dòmi, yon ti somèy, yon ti pliye men pou repoze,” ³⁴Konsa mizè ou va vin parèt sou ou tankou yon vòlè; ak bezwen tankou yon bandi ak zam.