Salmos 92

Bom é louvar ao Senhor

Псальм. Сьпеў на дзень суботы. ²Добра славіць ГОСПАДА і выслаўляць імя Тваё, Найвышэйшы! ³Апавядаць раніцаю міласэрнасьць Тваю, і вернасьць Тваю — уначы, ⁴на дзесяціструнным псалтыры і на гусьлях граючы.

⁵Бо Ты ўзьвесяліў мяне, ГОСПАДЗЕ, справамі Тваімі, творам рук Тваіх буду радавацца. ⁶Якія вялікія ўчынкі Твае, ГОСПАДЗЕ; вельмі глыбокія думкі Твае. ⁷Чалавек бязглузды ня будзе ведаць, і дурань не зразумее гэтага.

⁸Калі бязбожнікі зелянеюць, як трава, і ўсе ліхадзеі квітнеюць, няхай будуць яны зьнішчаны на вякі! ⁹А Ты, ГОСПАДЗЕ, узвышаны на вякі! ¹⁰Бо вось ворагі Твае, ГОСПАДЗЕ, бо вось ворагі Твае загінуць, і будуць расьцярушаныя ўсе ліхадзеі.

¹¹І Ты ўзнясеш рог мой, як у аднарога, я буду памазаны сьвежым алеем. ¹²Будуць глядзець вочы мае на ворагаў маіх, і пра злачынцаў, якія паўсталі супраць мяне, пачуюць вушы мае. ¹³Праведнік быццам пальма зелянее, ён расьце, як той кедр на Лібане.

¹⁴Насаджаныя ў Доме ГОСПАДА зелянеюць на пана­дворках Бога нашага. ¹⁵Яны плод свой даюць і ў старасьці, яны сакавітыя і сьвежыя, ¹⁶каб абвяшчаць, што ГОСПАД справядлівы, Скала мая, і няма ў Ім беззаконьня.