Salmos 83

Não te cales, ó Deus

Сьпеў. Псальм Асафа. ²Божа! Не маўчы, і ня будзь у маўчаньні і ў супакоі, Божа! ³Бо вось, узварухнуліся ворагі Твае, і ненавісьнікі Твае паднялі галаву.

⁴Супраць народу Твайго яны кнуюць [намеры] таемныя і радзяцца супраць тых, каго Ты ахоўваеш. ⁵Яны сказалі: «Хадзіце і сатрэм іх між народамі, і імя Ізраіля ня будзе ўзгадвацца болей». ⁶Бо радзіліся яны аднадумна, супраць Цябе заключылі запавет ⁷намёты Эдому і Ізмаэльцы, Мааў і Агаране, ⁸Геваль і Амон, і Амалек, Філістынцы і жыхары Тыру.

⁹І Асур далучыўся да іх, стаўся ён рамяном для сыноў Лота. (Сэлях) ¹⁰Зрабі ж Ты ім як Мадыяну, як Сісэры, як Явіну каля ручая Кішон, ¹¹якія зьнішчаныя каля Эндору, сталіся як гной на зямлі.

¹²Учыні з імі, з магнатамі іхнімі як з Арэвам і Зэвам, і з усімі князямі іхнімі, як з Зэвахам і Сальмунам, ¹³якія казалі: «Возьмем сабе ў спадчыну сялібы Божыя!» ¹⁴Божа мой! Зрабі іх як [пыл у] віхуры, як салому пад ветрам!

¹⁵Як агонь паліць лясы і як полымя апальвае горы, ¹⁶гэтак Ты перасьледуй іх бурай Тваёю і віхурай Тваёй напалохай! ¹⁷Напоўні сорамам абліччы іхнія, і будуць шукаць імя Тваё, ГОСПАДЗЕ.

¹⁸Няхай будуць асаромленыя і спалоханыя навечна, няхай будуць у сораме і загінуць, ¹⁹і даведаюцца, што імя Тваё — ГОСПАД, і толькі Ты — Найвышэйшы над усёй зямлёю.