Provérbios 18

Um amigo mais chegado que um irmão

Свавольны шукае жаданьня [свайго] і кожнай цьвярозай думцы працівіцца. ²Дурань ня хоча застанаўляцца, а толькі каб выявіць розум свой. ³Калі прыходзіць бязбожнік, прыходзіць пагарда, і разам з сорамам — ганьба.

⁴Словы вуснаў чалавечых — глыбокія воды, крыніца мудрасьці — бурлівы ручай. ⁵Нядобра зважаць на аблічча бязбожнага, каб паваліць праведнага на судзе. ⁶Словы дурня прыводзяць да спрэчкі, і вусны ягоныя выклікаюць бойку.

⁷Вусны дурня — загуба ягоная, а мова ягоная — пастка для душы яго. ⁸Словы пляткара — як прысмакі, яны зыходзяць у глыб нутра. ⁹Нядбайны ў рабоце сваёй — брат нішчыцеля.

¹⁰Імя ГОСПАДА — магутная вежа, пабяжыць туды праведнік і будзе ў бясьпецы. ¹¹Маёмасьць багатага — умацаваны горад для яго, уяўляецца яна яму як муры высокія. ¹²Перад загубай вывышаецца сэрца чалавека, а ўпакораньне папераджае славу.

¹³Хто дае адказ раней, чым выслухае, той неразумны, і сорам яму. ¹⁴Дух чалавека пераносіць немач сваю, але дух маркотны хто можа ўзьняць. ¹⁵Сэрца разважнае набывае веды, і вуха мудрых шукае веданьня.

¹⁶Падарунак чалавека дае яму прастору і да вялікіх прывядзе яго. ¹⁷Першы ў спрэчцы сваёй [падаецца] справядлівым, але прыйдзе бліжні ягоны і выспрабуе яго. ¹⁸Жэрабя спыняе сваркі і дзеліць між магутнымі.

¹⁹Пакрыўджаны брат — як умацаваны горад, а сваркі — як завалы ў замку. ²⁰З плоду вуснаў сваіх насыціць чалавек нутро сваё, з прыбыткаў губаў сваіх насыціцца. ²¹Сьмерць і жыцьцё ў руцэ языка; хто любіць яго, будзе есьці плады ягоныя.

²²Хто знайшоў жонку, той знайшоў добрае і атрымаў ласку ад ГОСПАДА. ²³Бедны гаворыць, умольваючы, а багаты адказвае груба. ²⁴Чалавек, які мае сяброў, сам павінен быць сяброўскі, і бывае, што сябар больш любіць, чым брат.